ئەمڕۆ پێنجشەم، ٢٩ی شوباتی ٢٠٢٤، ڕێبەر ئەحمەد وەزیری ناوخۆی حکوومەتی هەرێمی کوردستاندا، لە میانەی بەشداریکردن لە کردنەوەی نۆیه‌مین پیشانگای ئوتۆمبێل و پارچەی یەدەگ و جوانکاری ئوتۆمبێل لە هەولێر و لە وەڵامی پرسیاری ڕۆژنامەنووسان لەمەڕ هاتنی شاندێکی دیوانی چاودێری عێراق بۆ هەرێمی کوردستان، ڕایگەیاند، هەموو هاوکارییەک لەگەڵ دیوانی چاودێری دارایی عێراق دەکرێت و وەزارەتی دارایی و ئابووری هەرێمی کوردستان وەک پێشوو، هەر هاوکاری و کارئاسانییەکیان پێشکەش دەکات.
ڕێبەر ئەحمەد، وەک ئاماژەیەک بەوەی حکوومەتی هەرێمی کوردستان سەرجەم داتا و زانیارییە پێویستییەکانی بۆ حکوومەتی عێراق خستووەتەڕوو، گوتی: “هیچ نەماوە کە ئەوان داوای بکەن، هەر پرسیارێکیان هەبێت، وەک پێشوو هاوکارییان دەکەین”.
وەزیری ناوخۆ، لەبارەی بڕیارەکەی ئەمدواییەی دادگای باڵای فیدڕاڵیی عێراق لەمەڕ مووچە و شایستە داراییەکانی مووچەخۆرانی هەرێمی کوردستان وەڵامی ڕۆژنامەنووسانی دایەوە و گوتی، “هێشتا ئێمە و خەڵکیش بەدروستی تێنەگەیشتوون ئەو بڕیارەی دادگەی فیدڕاڵی چۆنە و چۆن جێبەجێ دەکرێت”.
زیاتر گوتی: “پێویستە وەزارەتی دارایی هەرێم و وەزارەتی دارایی بەغدا بە لێکتێگەیشتنێک بگەن کە هەم لەگەڵ دەستور و یاساکان بگونجێت و هەم ڕەچاوی تایبەتمەندییەکانی هەرێمی کوردستان بکرێت، وەک هەرێمێکی دەستوری کە بەخوێنی شەهیدان دروستبووە”.
