مێژووی ڕۆژنامەگەری كوردی مێژوویەكی نەپساوەی خەباتی بێوچانە، كە شانبەشانی مێژووی بزووتنەوەی ڕزگاریخوازی نیشتمانی گەلی كوردستانە و، كتێبێكی كراوەی تۆماركردنی نەبەردییەكانی ئەم گەلە و گیانی بەرەنگاربوونەوەیەتی.
ئەم بنەمایە ڕێرەوەێكی پتەوی بۆ سەرهەڵدان و پەرەسەندنی ڕۆژنامەگەری كوردی بنیادنا، بە جۆرێك بە ڕیتمی ژیانی خەڵك و ئازارەكانی و تێكۆشان بۆ گۆڕانكاری كۆمەڵایەتی، ئاشنا و تێكەڵ بێت.
هەروەك هەر بەشێكی دیكەی دیاردەكانی ژیان، كە لە گۆڕانكاری بەردەوامدایە، بواری كاری ڕۆژنامەگەری هەردەم لە دەرەوەی ڕەوشێكی چەقبەستوو و وەستاو نەبووە و، بە ڕەچاوكردنی پەرەسەندنەكانی شێواز و ئامرازەکانی ڕاگەیاندن لە سەردەمی گڵۆبالیزم و ژیری دەستكرد و شۆڕشی مەزنی بواری پەیوەندییەكان لە جیهاندا، لەسەرووی هەموویانەوە تایبەتمەندییەكانی كۆمەڵگای كوردستان و شوناس و ئاستی ناكۆكی و ململانێیە ناوخۆییەكان، ئەرك و بەرپرسیاری نوێ دەكەوێتە ئەستۆی بواری ڕۆژنامەگەری و خودی ڕۆژنامەنووسان، كە پێویست دەكات جەخت لەسەر ئەم خاڵانە بكرێتەوە:
ـ وردی و بابەتیبوون لە كاری ڕۆژنامەگەریدا و دڵنیابوون لە ڕوونی و درووستیی زانیارییەكان بەو مەبەستەی بوار بە چەواشەكردن و هەواڵ و زانیاری نەسەلمێنراو نەدرێت.
ـ جەختكردنەوە لەسەر ئازادی ڕا و ڕادەربڕین و دابینكردنی بۆ تاك و گەل.
ـ ڕێزگرتنی بەها كۆمەڵایەتییە ئەرێنییەكان و دژایەتیكردنی بیری ڕەگەزپەرستی و جیاكاری نەتەوەیی و ئایینیی.
ـ داكۆكیكردن لە پرسی ژنان و منداڵان و مافەكانیان.
ـ دووركەوتنەوە لە مشتومڕی كەسی و شەڕی میدیایی لە نێوان ڕۆژنامەنووسان و ڕێگاگرتن لە بەكارهێنانی ئەرك و كار و چالاكییەكانیان بە مەبەستی ململانێی حزبایەتی.
ـ پشتبەستن بە بەڵگەنامەی فەرمی و متمانەپێكراو و سەرچاوەی دروستیی هەواڵ و زانیاری.
ـ دووركەوتنەوە لە وروژاندن لە كاتی ئەنجامدانی كاری ڕۆژنامەنووسیدا، بەتایبەتی لە كاتی ڕووماڵكردنی ڕووداوە هەمە جۆرەكان.
ـ كاركردن بۆ دروستكردنی زمانی دیالۆگ لە نێوان ڕا و بۆچوونە ناكۆكەكان و هاندانی كۆكبوون و گەیشتن بەو خاڵە هاوبەشانەی كە خزمەتی تەبایی و سەقامگیری و لەیەكترنزیكبوونەوە دەكات.
ـ دووركەوتنەوە لە ئارەزووی كەسی لە گواستنەوەی هەواڵ، كە ئاكامەكەی سووكایەتی و تۆقاندنی بەرانبەر بێت و مەبەست لێی شێواندنی دامەزراوەیەكی گشتی یان تایبەتی یان كەسایەتییەكی سیاسی و كۆمەڵایەتی بێت.
ـ ئامادەبوون بۆ داننان بە هەڵە و ڕاستكردنی زانیارییەكان و ڕێزگرتن لە مافی بەرانبەر بۆ ڕوونكردنەوەی زیاتر و وەڵامدانەوە.
ـ ڕیزبەندیكردن لە نێوان گەیاندنی هەواڵ و گەیاندن و دەربڕینی ڕا و بۆچوون سەبارەت بە هەر بابەتێك کە مایەی گفتوگۆ بێت لە نێو كۆمەڵگادا.
ـ گرنگی بایەخدان بە تایبەتمەندییە هەمەجۆرەكانی بواری كاری ڕۆژنامەگەری، نەك تەنیا لە بواری ئامرازەكان وەك ڕۆژنامە و تیڤی و ڕادیۆ و ئامرازەكانی تۆڕی كۆمەڵایەتی، بەڵكو لە بواری تایبەتمەندییەكانی بابەتەكانی بواری سیاسی و ئابووری و كۆمەڵایەتی و كەلتووری و… هتد، جگە لە تایبەتمەندییەكانی كار و شێوازی نووسین.
ـ ڕووبەڕووبوونەوەی كەناڵ و دەزگا دەمامەكدراوەكان و كاركردن بۆ كەنارخستنیان و ئاشكراكردنی هەواڵی درۆ و بوختان كە بەمەبەستی شێواندنی ڕەوشی سیاسی و ئابووری و كۆمەڵایەتی كوردستان ئەنجام دەدرێن.
ـ وریابوون لەو هەواڵ و بابەتانەی كە نەیارانی گەلی كوردستان لە مەتبەخی سیاسی و هەواڵگری خۆیان لە چوارچێوەی شاڵاوی بێهودەیی گەلەكان و لاوازكردنی گیانی بەرەنگاربوونەوەیدا، دایدەڕێژن.
ـ داكۆكیكردن لە ژیان و گوزەرانی خەڵكی كوردستان و خەڵكی زەحمەتكێش و كرێكاران و جووتیاران و لاوان و خاوەن پێداویستییە تایبەتییەكان.
ـ كاركردنی بە كۆمەڵ بۆ داكۆكیكردن لە مافی سەرجەم ڕۆژنامەنووسان و، دابینكردنی ڕەوشێكی لەبار بۆ كاری ڕۆژنامەنووسانی مێینە بە جۆرێك هیچ شێوازێكی فشاریان لە بواری شوێنی كار و شوێنی چالاكییەكان لە نێو كۆمەڵگادا نەمێنێت.
هەرچەندە ئەم خاڵانەی لەسەرەوە ئاماژەمان پێكرد دەچێتە ئەركی خودی ڕۆژنامەنووسان و نەریت و ڕەوشتی كاری ڕۆژنامەگەری و، باپەندبوون پێوەی، زەمینەیەكی لەبار و تەندروست بۆ كاری ڕۆژنامەگەری دروست دەكات و بەشێكیش لەو خاڵانە دەچنە بواری ئەركی دەزگاكانی ڕۆژنامەنووسی، بەڵام ئەركی سەرەكی و گرنگ بۆ دابینكردنی زەمینەیەكی لەبار و دروست بۆ كاری ڕۆژنامەگەری بۆ سیاسەتی پەیڕەوكراوی دەسەڵات دەگەڕێتەوە لە قۆناغێكی گواستنەوەی ئاڵۆزدا، كە دیاردەكانی زەوتكردنی ئازادییەكان و ڕێگاگرتن لە واڵابوونیان ماوە و هەنگاوەكانی پێچەوانەش بۆ فرەوانكردنی ئازادی ڕادەربڕین و گەیشتنی زانیاری بۆ تاك و دروستكردنی بەرپرسیاری بەكۆمەڵ بەرانبەر چارەنووسی نیشتمان و دابینكردنی ژیانی شایستە بۆ گەل، خاوە و سەقامگیر نەبووە و، هەردەم ئەو هەنگاوانەش دووچاری مەترسی پێشێلكردن دەبنەوە.
لەو ڕوانگەیەوە و لە ساڵڕۆژی ڕۆژنامەگەری كوردیدا گرنگە جەخت لەسەر گەڵاڵەكردنی قانوونێكی گشتگیر و ڕوون بۆ تەواوی میدیا لە هەرێمی كوردستاندا گەڵاڵە و بڕیار بدرێت، كە بنەماكەی فرەوانكردنی ئازادی ناو كۆمەڵگا و پاراستنی ئازادیی ڕۆژنامەگەری بێت و، ڕێگا لە پێشێلكردنی مافی ڕۆژنامەنووس بگرێت و ژیانیان بپارێزێت و، ئەم هەنگاوەش بە بەشداری كارای خودی ڕۆژنامەنووسان و پسپۆڕانی بواری ڕاگەیاندن ئەنجام دەدرێت و، بەشێك لە پڕۆسەی بنیادنان و گەشەپێدانی كوردستان لە بوارە جۆراجۆرەكاندا دەبێت.
ڕۆژنامەگەری كوردی خاوەن مێژوویەكی پڕشنگدارە، كە جێی شانازی گەلە تێكۆشەرەكەمانە و، بەرپرسیاری ئەمڕۆش لەسەر خودی حكوقمەت و خودی ڕۆژنامەنووسان، پاراستنی ئەو مێژووە پڕ سەروەری و، بەردەوامبوونی وەك زنجیرەیەكی نەپساو، كە نەوەی داهاتووی گەلەكەمان لەو كاروانەدا بەردەوام بن.
