بۆ ئەم مەبەستە جەخت لەسەر ئەم خاڵانە بكرێت:
ـ كاركردن لە گوتاری سیاسیدا لەسەر نەهێشتنی چاوگەكانی بارگرژی لە ڕۆژهەڵاتی ناوەڕاستدا و سەقامگیركردنی ئاشتی تێیدا، كە پێویست بە چارەسەری سیاسی دیموكراتی عادیلانەی سەرجەم كێشەكان و دابینكردنی مافی سەرجەم نەتەوە و گەلانی ناوچەكە و دۆزی ڕەوای گەلی كوردستان لە سەرجەم پارچەكاندا دەكات. بۆ ئەم مەبەستەش پێویستە ستراتیجی سیاسی بزووتنەوەی ڕزگاریخوازی گەلەکەمان، پشت بە پەیامی ئاشتی و چارەسەری سیاسی ڕەوا ببەستێت.
ـ گەلی كوردستان فاكتەری سەرەكی و گرنگە بۆ سەرلەنوێ بنیاتنانەوەی ڕۆژهەڵاتی ناوەراست لەسەر بنەمایەكی نوێ، كە بەیەكەوەژیان و گەشەپێدانی وڵاتان و گەلانی ناوچەكە دابین بكات، ئەمەش بەپشتبەستن بە ئیرادەی ئازادانەی گەلانی ڕۆژهەڵاتی ناوەڕاست، دوور لە ڕەچەتەی ئامادەكراوی ناوەندە دەرەكییەكان، وەك پڕۆژەی “ئاژاوەی داهێنەرانە”ی کۆندالیزا ڕایس و ڕێکكەوتننامەی ئەبراهام لە چوارچێوەی ئاڕاستەی وڵاتە یەكگرتووەكانی ئەمریكادا سەبارەت بە ڕۆژهەڵاتی ناوەڕاستی نوێ، كە تەنیا لە ڕوانگەی پاراستنی ئاسایشی نەتەوەیی خۆیانەوە سیاسەت دادەڕێژن و خواست و ویست و هەڵبژاردەی گەلانی ناوچەكە بە هەند وەرناگرن.
ـ دوور لە بەرهەمهێنانەوەی مۆدێلی دەوڵەتی ناوەندی ڕەها كە هەندێک ناوەندی نێودەوڵەتی كاری بۆ دەكەن، ڕۆژهەڵاتی ناوەڕاستی نوێ پێویستی بە سیستمی دیموكراتی و سەرجەم شێوازەكانی لامەركەزی سیاسی و مەدەنی دەستووری بۆ شێوازی حوكمڕانی دەوڵەتەكانی ناوچەكە هەیە، بە جۆرێك دیموكراسی تەنها میكانیزمی گەیشتن بە حوكمی نەتەوە یان تایفەی زۆرینە نەبێت و تەنها لە ئەنجامدانی هەڵبژاردن و چەمكی زۆرینە و كەمینەدا كۆنەكرێتەوە، بەڵكوو وەك چەمكێكی گرێدراو بە پاراستنی سەرجەم ئازادییەكانی تاك و پێكهاتە كۆمەڵایەتییەكان و بەهەندوەرگرتنی فرەیی نەتەوەیی و ئایینی و مەزهەبییەوە، دوور لە هەژموونی باڵادەستی بەناوی زۆرینەوە، مامەڵەی لەگەڵدا بكرێت. ئەمەش زەمینە بۆ داننان بە مافی چارەنووسی سەرجەم گەلانی ناوچەكە دەڕەخسێنێت و بەگشتی دوور لە قایلبوون بە ئیرادەی سەربەخۆیی گەلانی ناوچەكە، ئاشتی و ئاسایش سەقامگیرنابێت و چارەسەرەكان كاتی دەبن.
ـ جەختكردنەوە لەسەر ئەو ڕاستییەی، كە بەدرێژایی مێژوو ململانێی گەلی كوردستان دژ بە گەلانی ناوچەكە نەبووە، بەڵكوو لەگەڵ ئەو ڕژێمانە بووە، كە مافی گەلی كوردستانیان زەوتكردووە. بەم پێیەش گرنگە پەیامی كوردستانی باشوور هاندان و یارمەتیدانی دەوڵەتە دراوسێكانی كوردستان بێت بۆ دۆزینەوەی چارەسەری ئاشتییانە، نەك دەستتێوەردان لە كاروباری ناوخۆیی وڵاتانی دراوسێ. هاوكات لەگەڵ ئەم ئاڕاستەیەدا گرنگە بزووتنەوەی گەلی كوردستان لە هەر پارچەیەكی كوردستاندا كار بۆ كاری هاوبەش و هاوپەیمانی سیاسی لەگەڵ سەرجەم ئەو نەتەوە و پێكهاتانە بكات، كە بەدرێژایی ماوەی بوونی دەوڵەت لەم ناوچەیەدا مافیان زەوتكراوە.
ـ ڕەچاوكردنی تایبەتمەندی سیاسی و كۆمەڵایەتی و ئاستی پەرەسەندنی بزووتنەوەی ڕزگاریخوازی گەلەكەمان لە هەر پارچەیەكی كوردستاندا و لەسەر ئەم بنەمایەش دان بە سەربەخۆیی سیاسیی لایەنەكانی بزووتنەوەكە لە داڕشتنی بەرنامە و هەڵبژاردنی شێوازی تێكۆشانی هەر پارچەیەك بنرێت.
ـ جەختكردنەوە لەسەر قەدەغەكردنی چارەسەری كێشەی ناوخۆیی بزووتنەوەكەمان لەسەر ئاستی یەك پارچە و لەسەر ئاستی كوردستان بەگشتی لە ڕێگای بەكارهێنانی هێزەوە.
ـ گرنگیدان بە بەشداریپێكردنی نەتەوەكانی دیكەی كوردستان لە دانانی نەخشەڕێگای مامەڵەكردن لەگەڵ ڕووداوەكان و بنیاتنانی هاوپەیمانی پێویست لەگەڵیاندا و داننان بە مافە نەتەوەییەكانی سەرجەم ئەو پێكهاتانە بەو جۆرەی خۆیان دەستنیشانی دەكەن.
ـ داڕشتنی گوتاری سیاسی نوێ دەربارەی هەلومەرجی ژنان و لاوان و بەشداری كۆمەڵگەی مەدەنی لە ژیانی سیاسی و بوارە گشتییەكاندا.
ـ ئەم ئاڕاستە سیاسییەی باسمانكرد پێویستی بە دانانی میكانیزمی گونجاو هەیە، لەوانە كاركردن بۆ ئەنجامدانی دیالۆگی نیشتمانی كوردستانی لە هەر پارچەیەكی كوردستان و پەلەكردن لە ئەنجامدانی ئەم كارە لە كوردستانی باشوور بە بەشداری لایەنی سیاسی و ڕێكخراوەكانی كۆمەڵگەی مەدەنی و پسپۆڕ و ئەكادیمیستی شارەزا بەمەبەستی سازدانی دیالۆگێكی نیشتمانی كوردستانی ڕەخنەگرانە سەبارەت بە چەمكی حوكمڕانی لە هەرێم و بەشداری لە پڕۆسەی سیاسی عێڕاقدا، كە لە 2003 تا ئێستا گۆڕانكاری چلۆنایەتی بەسەرداهاتووە و پێویستە هەڵسەنگاندن بۆ مان و نەمان و بابەتی بەردەوامبوون لەو پڕۆسە شكستخواردووەدا بكرێتەوە، بەتایبەتی كە ئاڕاستەی سیاسی دەسەڵاتدارانی عێراق بەرەو ناوەندێتیی ڕەهایە.
