کامەران عوسمان ئەندامی تیمی کوردستانی عێراقی ڕێکخراوی (CPT)ی ئەمریکی ڕایگەیاند، لەکاتژمێر ٢:٣٠ خوولەکی بەرەبەیانی ئەمڕۆدا، ٤٥ تانک و زرێپۆشی سوپای تورکیا لە ڕێگەی “ناحیەی بامەڕنێ”وە بە قەزای ئامێدیدا تێپەڕبوون و چوونە ناو گوندی سەرگەلێ لە قەزای ئامێدی.
ئاماژەی دا: “هێزەکە لە پشتی گوندی سەرگەلێ جێگیرکراوە و لەبەرەبەیانی ئەمڕۆشدا، سێ جار ناو گوندی سەرگەلێ بۆردمانکراوە”.
ئەندامەکەی تیمی کوردستانی عێراقی ڕێکخراوی (CPT) ڕایگەیاند: “لەگەڵ هاتنی هێزەکەی تورکیادا، بەدرێژایی شەوی ڕابردوو، فڕۆکە جەنگی و فڕۆکە بێفڕۆکەوانەکانی سوپای تورکیا بۆردمانی گوندەکانی نێوان “گەلی ڕەشاڤا و گوهەرزێ”یان کردووە”.
زانیارییەکانی ڕێکخراوەکە ئاماژە بەوە دەکەن، گوندی سەرگەلێ بە دووری ٦ کیلۆمەتر دەکەوێتە ڕۆژهەڵاتی قەزای ئامێدی و ئێستا ٤٧ خێزان لەناو گوندەکەدا دەژین. بەهۆی ئۆپەراسیۆنەکانی تورکیا لە ١٠ ڕۆژی ڕابردوودا، ٥٥٪ی دارستان و زەوی کشتوکاڵیی گوندەکە سووتاون.
