بەهۆی ئەنفلوەنزای پەلەوەرەوە، ژمارەیەکی زۆر لە نەورەسەکانی سەر زێی بچووک مرداربوونەتەوە.
بەڕێوەبەرایەتی پۆلیسی دارستان و ژینگەی ڕاپەڕین، ئەمڕۆ هەینی ١٠ی ئایاری ٢٠٢٤، ڕایگەیاند، دوای ئەو گۆڕانکارییەی کەشوهەوا، کۆمەڵێکك باڵندەی کێوی لە جۆری (نەورەس) لەسەر زێی بچووك تووشی نەخۆشییەکی تایبەت بوونە و بەهۆیەوە مردار دەبنەوە.
بەڕێوەبەرایەتییەکە، هەر ئەمڕۆ هەینی بە هەماهەنگی لەگەڵ بەڕێوەبەرایەتی ڤێتێرنەری ڕاپەڕین تیمێکی مەیدانیان بۆ بەدواداچوون لەبارەی مرداربوونەوەی نەورەسەکان پێکهێنا.
وەک پۆلیسی دارستان و ژینگەی ڕاپەڕین ئاماژەی بۆ کردووە، ئێستا چارەسەرێکی سەرەتاییان دەستپێکردووە، کە خۆی لە جیاکردنەوەی نەورسە تووشبووەکان دەبینێتەوە لەوانی دیکە.
لە پشکنینی تیمەکەدا دەرکەوتووە، نەورەسەکان بەهۆی ڤایرۆسی ئەنفلەوەنزای پەلەوەرەوە مردار دەبنەوە.
