زێدپرێس
بەپێی ئەلمۆنیتۆر، مەسرور بارزانی لە ٣ی ئەیلوولی ٢٠٢٣، نامەیەکی بۆ جۆ بایدن سەرۆکی ئەمریکا ناردووە و نامەکە یەکشەمی ڕابردوو گەیەنراوەتە کۆشکی سپی.
سەرۆکوەزیرانی هەرێم لە نامەکەیدا، داوای پاڵپشتی ئەمریکا دەکات و دەڵێ “ئێستا ئەو نامەیەت بۆ دەنووسم دیسان لە ساتەوەختێکی چارەنوسسازی مێژووماندا، دۆخێک، کە دەترسم لەوانەیە زەحمەتیمان هەبێ بۆ ئەوەی بەسەریدا زاڵ ببین. ئێمە لەڕووی ئابوورییەوە خوێنمان لێ دەتکێ و لەڕووی سیاسیشەوە بە سەختی بریندارین”.
لە بەشێکی دیکەی نامەکەدا، نووسیویەتی “بۆ یەکەم جار لەوەتەی سەرۆکوەزیرانم، نیگەرانییەکی قوڵ دایگرتووم کە ئەو هەڵمەتە ناشەرافەتمەندانەیەی لەدژمان بەڕێوەدەچێت لەوانەیە ببێتە هۆکاری ڕوخانی ئەو مۆدێلە فیدراڵیەی عێراق کە ئەمریکا لە ٢٠٠٣ سپۆنسەری کرد و لەوکاتەوە لەپشتیەوە وەستاوە”.
هەر بەپێی ڕاپۆرتەکە، وەزارەتی دەرەوەی ئەمریکا، ڕەتی کردووەتەوە لێدوان لەسەر نامەکە بدات. بەرپرسێکی کۆشکی سپی لەسەر بابەتەکە گوتی، “ئێمە لێدوان لەسەر دانوستانە دیبلۆماسییە تایبەتەکان نادەین.” تاوەکوو ئێستا کۆشکی سپی بە فەرمی وەڵامی نامەکەی بارزانی نەداوەتەوە.
