ئەمڕۆ شەممە، ٢١ی حوزەیرانی ٢٠٢٥، یەکەم ڕۆژی هەڵگرتنی قەدەغەی ڕاوی ماسی بوو. وەرزی قەدەغەی ڕاوی ماسی لە ٢٠ی ئاداری ٢٠٢٥ەوە دەستی پێکرد و لە ٢٠ی حوزەیرانی ٢٠٢٥ کۆتایی هات.
لەوبارەیەوە، بەڕێوەبەرایەتی پۆلیسی دارستان و ژینگەی پارێزگای سلێمانی، ڕاگەیاندراوێکی بڵاوکردەوە و ئاماژەی دا، لەماوەی قەدەغەی ڕاوی ماسی، تیمەکانیان هەڵمەتی چڕوپڕی چاودێریکردنیان لە سنوورە ئاوییەکانی وەک “دەریاچەی دووکان، دەربەندیخان لە سنووری دەربەندیخان و شارەزوور و سەیدسادق، سنووری زێی بچووک، چەمی باسەڕە و شارباژێڕ” بەڕێوەبردووە.
“تیمەکانمان لەڕێگەی خاڵی چاودێری و مەفرەزەی گەڕۆک بە شەو و بەڕۆژ چاودێری وردی سنوورە ئاوییەکانیان دەکرد”، پۆلیسی دارستان و ژینگە وای گوتووە.
بەگوێرەی ڕاگەیەندراوەکە، لەماوەی ئەو سێ مانگەدا، پۆلیسی دارستان و ژینگەی پارێزگای سلێمانی، (٩٦) کەسیان بەتۆمەتی ڕاوی ماسی دەستگیر کردووە و دەستیشیان بەسەر سەدان تۆڕی ڕاو و بەلەم و کەرەستەی جیاجیای ڕاودا گرتووە.
ئامارەکان بەم شێوەیەن:
- دەستگیرکردنی ٩٦ ڕاوچی.
- دەستبەسەرداگرتنی ٦١٦ تۆڕی قەبارە جیاوازی ڕاوی ماسی.
- دەستبەسەرداگرتنی ١٨٠ ماسی زیندوو کە لە تۆڕەکان لێکراونەتەوە و خراونەتەوە ناو ئاو؛ لەپاڵ ٧٧٢ ماسی ڕاوکراو.
- دەستبەسەرداگرتنی ٩ بەلەمی گەورە و ٧ بەلەمی بچووک و هەمەجۆر.
- دەستبەسەرداگرتنی ١٢ ئۆتۆمبێل و ١١ ماتۆڕسکیل.
- دەستبەسەرداگرتنی ٥١ قوولاپی ماسی گرتن.
- دەستبەسەرداگرتنی ٤ کەڵەک، ٣ چووپ و ١٤ سەوڵ.
- دەستبەسەرداگرتنی یەک شەداو، یەک کلاشینکۆف، دوو تاپڕ و ٢٦ فیشەکی کلاشینکۆف.
- دەستبەسەرداگرتنی یەک مۆلیدەی کارەبایی.
