ئەمڕۆ دووشەم، ٤ی ئازاری ٢٠٢٤، لەگەڵ نزیکبوونەوەی جەژنی نەورۆز و هاتنەپێشەوەی وەرزی بەهار، کە چاوەڕوانی گەشت و سەیرانی تێدا دەکرێت، هەردوو دەستەی پاراستن و چاککردنی ژینگە و دەستەی گەشتوگوزار لە هەرێمی کوردستان ڕاگەیەندراوێکی هاوبەشیان بڵاوکردەوە.
لە ڕاگەیەندراوەکەدا، داوا لە هاووڵاتییان و سەیرانکەران کراوە، لە گەشت و سەیرانەکاندا، پابەندی ڕێکارەکانی ژینگەپارێزی بن و لەو ڕوانگەیەشەوە ئاماژەیان بە چەند خاڵ و ڕێوشوێنێک کردووە لەپێناو پیادەکردنیان لەلایەن گەشتیاران و سەیرانکەرانەوە.
دەقی ڕاگەیەندراوی هاوبەشی دەستەی پاراستن و چاككردنی ژینگە و دەستەی گەشتوگوزار:
پیرۆزبایی هاتنی ساڵی نوێی كوردی لە گشت هاووڵاتییانی هەرێمی كوردستان دەكەین كە هاوكاتە لەگەڵ وەرزی گەشت و سەیران لە ناو بەهارێكی خۆش و ڕەنگین لە كوردستان. هیوادارین كاتێكی خۆش و كامەران بەسەربەرن لە شوێنە گەشتیاری و سەیرانگاكان و ڕەچاوی ئەم خاڵانەی خوارەوە بکەن:
- 1. پاراستنی سەیرانگاكان و شوێنە گەشتیارییەكان بە پاكوخاوێنی و پیس نەكردنیان .
- 2. لە دوای ئاگركردنەوە و تێپەڕاندنی ڕۆژێكی خۆش لە سەیرانگاكان و لە ناو دارستانەكان، ئاگرەكە بە تەواوی بكوژێننەوە و دڵنیابن لەوەی كە هیچ پاشماوەیەكی ئاگر نەماوە.
- 3. پاراستنی دارستانەكان و نەشكاندنی دار و درەختەكان و بەكارنەهێنانیان وەك سووتەمەنی .
- 4. فڕێنەدانی پاشماوەكان لە سەیرانگاكان و كۆكردنەوە و هێنانەوەی پاشماوەكان بۆ ئەو شوێنانەی تەرخانكراون بۆ فڕێدانی پاشماوەكان یان هێنانەوەیان لەگەڵ خۆتان بۆ حاویەی زبڵ و خاشاكی بەردەمی ماڵەكانتان .
- 5. دروستكردن و ئامادەكردنی خواردن بەو بڕەی كە دەخورێت و بەكاردەهێنرێت بۆ ئەوەی نەبێتە پاشماوە و سەیرانگاكان پیس نەكات، لە كاتی هەبوونی خواردنی زیادە لە شوێنێك دابنرێت بۆ ئەوەی باڵندە و ئاژەڵەكان بیخۆن .
- 6. پیس نەكردنی ڕووبار و چەمەكان بە فڕێنەدانی پاشماوەكان بۆ ناویان بۆ ئەوەی نەبێتە هۆی پیسبوونی ئاو و كاریگەری لەسەر زیندەوەرانی ناو ئاوەكە دروست نەکات .
- 7. گوێڕایەڵی بۆ پۆلیسی پاراستنی شوێنە گەشتیارییەكان و سەیرانگاكان .
- 8. لەشەوی سەری ساڵدا واتە لە نەورۆز تایە مەسوتێنن، لەبەرئەوەی زۆر پیسکەری ژینگەیە، تەنیا لەلایەن لایەنی پەیوەندیدار لە پارێزگا و ئیدارەکان مەشخەڵی نەورۆز دادەگیرسێت.
- 9. كۆمپانیا گەشتیارییەكان ڕاسپێردراون كە ژینگەی سەیرانگا و شوێنە گەشتیارییەكان بە پاك و خاوێنی بپارێزن.
- 10. داوا لە گەشتیاران و سەیرانكاران دەكەین هاوكاری تیمەكانی گەشتوگوزار و ژینگە بن كە ڕێنوێنی و ڕێپیشاندەریانن بۆ سەیران و گەشتەكان.
- 11. دووركەوتنەوە لەو شوێنانەی كە مەترسی هەبوونی مینی لێ دەكرێت و دەستكاری نەكردنی بۆ سەلامەتی هەمووان.
- 12. ڕاونەكردن و ئازارنەدانی ئەو گیانلەبەرە كێویانەی كە لە نزیك شوێنە گەشتیارییەكان و سەیرانگاكان هەن.
- 13. خۆدوورگرتن لە دروستكردنی قەرەباڵغی ئۆتۆمبێل لە ڕێگاكان و پەكخستنی ڕێڕەوی ڕۆیشتن و بەكارنەهێنانی ئامێری ئاگاداركردنەوە (هۆڕن لێدان) بۆ ئەوەی ژاوەژاو دروست نەبێت.
لەگەڵ ڕێزماندا
بەڕێوەبەری ڕاگەیاندن و پەیوەندییەکانی دەستەی گەشتوگوزار
بەڕێوەبەری فەرمانگەی هۆشیاری و ڕاگەیاندنی دەستەی ژینگە
٤/٢٠٢٤/٣/٤
