ناوەندی هاوبەشی هەماهەنگی قەیرانەکان سەربە وەزارەتی ناوخۆی حکوومەتی هەرێمی کوردستان، لە خشتەیەکی تایبەتدا هەڵسەنگاندنی بۆ زیانەکانی باران بارین لەماوەی نێوان ١٨ تا ٢١ی ئازاری ٢٠٢٤ لە هەرێمی کوردستان و بەدیاریکراوی پارێزگاکانی هەولێر و دهۆک و ئیدارەی سەربەخۆی زاخۆ کردووە.
بەگوێرەی ئاماری ناوەندەکە، لە ئەنجامی لافاوەکاندا، سێ هاووڵاتی گیانیان لەدەستداوە و ١٣ هاووڵاتی دیکەیش بریندار بوون. لەکاتێکدا ٧٦٤ کەس ڕزگار کراون، سەرجەمی قوربانییەکان لە دهۆک و زاخۆن.
بەهۆی تێکچوون و داڕووخانی خانووی هاووڵاتییانەوە، کە ٢١ خانوو بە تەواوەتی ڕووخاون؛ ١٧ خانوو لە دهۆک، سێ خانوو لە زاخۆ و خانوویەک لە هەولێر، هەروەها هەزار و ٨١٢ خانوویش زیانیان بەرکەوتووە، بەهۆیەوە ژمارەیەکی زۆر لە هاووڵاتییان بۆ هۆتێل و مۆتێلەکان گواسترانەوە، کە ناوەندی هاوبەشی هەماهەنگی قەیرانەکان ئاماژەی بە گواستنەوەی هەزار و ٥٧٩ کەس کردووە و لەو ژمارەیەدا هەزار و ٤٩ هاووڵاتییان لە شاری دهۆک بوون.
هەر لە ئەنجامی باران بارین و دروستبوونی لافاودا، ٢٣٦ ئۆتۆمبێلی هاووڵاتییان زیانیان بەرکەوتووە و ٣٠ پڕۆژەی حکوومیش تووشی زەرەروزیان بوون.
ئامارەکە، ئاماژەی بەوەش کردووە، کە ٤١٢ دووکان و مارکێت بە هەمان شێوە زیانیان بەرکەتووە و ٤٠٠ سەر ئاژەڵیش لە ئاوی لافاودا خنکاون، کە هەر هەموویان لە سنوری زاخۆ بوون.
ناوەندەکە، زیانی ماددی لافاوەکەی بە سەرووی ٦٤ ملیار و ١٢٥ ملیۆن خەمڵاندووە، کە زۆرترین زیان بەر دهۆک کەوتووە بە زیاتر لە ٤٧ ملیار دینار و لە پلەی دووەمیشدا زاخۆ کە زیاتر لە ١٥ ملیار دینار زیانی لێکەوتووە و پاشان پارێزگای هەولێر کە ٩٦٤ ملیۆن دینار زیانی هەبووە.
