به‌ڕێوه‌به‌رایه‌تی گشتی حه‌ج و عومڕه‌ی هه‌رێمی كوردستان، ئەمڕۆ یەکشەم، ٧ی نیسانی ٢٠٢٤ لە ڕاگەیەندراوێکدا، هۆشداری دا، سەبارەت بەو بانگەشانەی لە ڕێگەی تۆڕە کۆمەڵایەتییەکان و لەلایەن کەسانێکەوە بەناوی کۆمپانیای حەج و عومرە یان بەناوی تاکەکەسییەوە بانگەشەی حەجی بازرگانی دەکەن.
بەڕێوەبەرایەتییەکە ڕوونی دەکاتەوە، هیچ شتێک لە کوردستان و عێراق بەناوی حەجی بازرگانییەوە نییە و ئه‌وه‌ی بانگه‌شه‌ی بۆ ده‌كرێت بردنی خه‌ڵكه به ڤیزای ساڵی، یاخود ڤیزای بازرگانی، كه ئه‌وه‌یش له لایه‌ن وه‌زاره‌تی حه‌جی سعوودییه‌وه قه‌ده‌غه كراوه و ڕێگەپێدراو نییه بۆ ئه‌داكردنی حه‌ج و هه‌ر كه‌سێك ده‌ستگیر بكرێت به‌پێی ڕێنمایی وه‌زاره‌تی حه‌ج سزای قورسی ده‌بێت.
دەقی ڕاگەیەندراوەکە:
ماوه‌یه‌كه له تۆڕه كۆمه‌ڵاتییه‌كان و له لایه‌ن خه‌ڵكانێكه‌وه به ناوی كۆمپانیای حه‌ج و عومره، یاخود به‌ناوی تاكه‌كه‌سی بانگه‌شه‌ی حه‌جی بازرگانی ده‌كرێت له هه‌رێمی كوردستان، گوایه ئه‌م حه‌جه ئێستا به‌رده‌سته و هیچ گرفتێكی نییه.
به‌ڕێوه‌به‌رایه‌تی گشتی حه‌ج و عومره‌ی هه‌رێمی كوردستان ئاگاداری هاووڵاتییانی هه‌رێمی كوردستان ده‌كاته‌وه، كه شتێك به ناوی حه‌جی بازرگانییه‌وه نییه، له هه‌رێمی كوردستان و ته‌نانه‌ت له عێراقیش، ئه‌وه‌ی بانگه‌شه‌ی بۆ ده‌كرێت بردنی خه‌ڵكه به ڤیزای ساڵی، یاخود ڤیزای بازرگانی، كه ئه‌مه‌یش له لایه‌ن وه‌زاره‌تی حه‌جی سعوودییه‌وه قه‌ده‌غه كراوه و ڕێگەپێدراو نییه بۆ ئه‌داكردنی حه‌ج و هه‌ر كه‌سێك ده‌ستگیر بكرێت به‌پێی ڕێنمایی وه‌زاره‌تی حه‌ج سزای قورسی ده‌بێت.
لێره‌وه هاووڵاتییانی هه‌رێمی كوردستان ئاگادارده‌كه‌ینه‌وه، كه به‌ڕێوه‌به‌رایه‌تی گشتی حه‌ج و عومره به‌رپرس نییه له‌م جۆره حه‌جكردنه، هه‌ر كه‌سێكیش له سعوودیه تووشی كێشه ببێت له‌سه‌ر ڤیزه‌ی ساڵی به‌ڕێوه‌به‌رایه‌تی گشتی حه‌ج و عومره به هیچ شێوه‌یه‌ك به‌رپرسیاریه‌تی هه‌ڵناگرێت، داوا له هاووڵاتییانیش ده‌كه‌ین ئاگاداری ئه‌م كاره‌بن بۆ ئه‌وه‌ی سه‌روه‌ت سامانیان به فیڕۆنه‌چێت و له كاتی ئه‌نجامدانی ئه‌و جۆره حه‌جكردنه دووچاری كێشه و گرفتی نه‌خوازراو نه‌بنه‌وه و ژیانیان نه‌كه‌وێته مه‌ترسییه‌وه.
له كۆتایشدا هۆشداری ده‌ده‌ینه هه‌ر كۆمپانیا و كه‌سێك ئه‌گه‌ر مۆڵه‌تی له به‌ڕێوه‌به‌رایه‌تی گشتی حه‌ج و عومره‌ی هه‌رێمی كوردستان وه‌رگرتووه، بانگه‌شه‌ی حه‌جی له‌م جۆره ده‌كه‌ن ئه‌وا لێپێچینه‌وه‌ی یاساییان له‌گه‌ڵدا ده‌كرێت تا ئه‌ندازه‌ی هه‌ڵوه‌شاندنه‌وه‌ی مۆڵه‌تی كاركردنیان له بواری حه‌ج و عومره له هه‌رێمی كوردستان و ته‌نانه‌ت له عێراقیش.
به‌ڕێوه‌به‌رایه‌تی گشتی حه‌ج و عومڕه‌ی هه‌رێمی كوردستان
7/4/2024
