ڕۆژی ١ی ئایاری ٢٠٢٤، مەکتەبی سیاسی یەکێتیی نیشتمانیی کوردستان بە سەرۆکایەتی بافڵ جەلال تاڵەبانی سەرۆکی حزبەکە کۆبووەوە. بەگوێرەی ڕاگەیەندراوی کۆبوونەوەکە، مەکتەبی سیاسی یەکێتی بڕیاریداوە “بە هەموو ڕێکارێکی یاسایی و بە هەوڵی هەمەلایەنەی سیاسی و دیپلۆماسی، بەگژ ھەوڵە ناڕەواکانی دواخستنی ھەڵبژاردنە چاوەڕوانکراوەکەی ١٠-٦ دا بچێتەوە”.
مەکتەبی سیاسی یەکێتی، هەوڵەکانی دواخستنی هەڵبژاردنی پەرلەمانی کوردستان بە “پێشهاتێکی مەترسیدار” ناودەبات.
دەقی ڕاگەیەندراوەکە:
مەکتەبی سیاسی بەسەرپەرشتی بافڵ جەلال تاڵەبانی، سەرۆکی یەکێتیی نیشتمانیی کوردستان کۆبووەوە و بەتوندی ئیدانە و سەرزەنشتی ھەر ھەوڵێکی تاکڕەوانە و دەنگۆی رێککەوتنی لایەنەکان لەسەر دواخستنی وادەی ھەڵبژاردنی پەرلەمانی کوردستان کرد کە بڕیارە لە ١٠-٦-٢٠٢٤ ساز بکرێت. پشتیوانیی خۆشی بۆ بەردەوامی رێکارەکانی کۆمسیۆنی باڵای ھەڵبژاردنەکانی عێراق لە پێناو سەرخستنی ھەڵبژاردن لە ھەمان وادەدا دووپاتکردەوە.
لە کۆبوونەوەکەی ئەمڕۆدا (١-٥-٢٠٢٤) کە لە دەباشان بەڕێوەچوو، مەکتەبی سیاسی یەکێتی لەپێناو داکۆکیکردن لە مافی دیموکراسیی خەڵکی کوردستان، بڕیاریدا بە ھەموو رێکارێکی یاسایی و بە ھەوڵی ھەمەلایەنەی سیاسی و دیپلۆماسی، بەگژ ھەوڵە ناڕەواکانی دواخستنی ھەڵبژاردنە چاوەڕوانکراوەکەی ١٠-٦ دا بچێتەوە.
کۆبوونەوە ھەمووانی لەو پێشھاتە ترسناکە ئاگادارکردەوە کە ھەر ھەوڵێک بۆ دواخستنی ھەڵبژاردن وێڕای ئەوەی پێچەوانەی بڕیارەکانی دادگای فیدراڵی و رێوشوێنەکانی کۆمسیۆنی باڵای ھەڵبژاردنە، دەشبێتە مایەی خەوشێکی گەورە بە تەوێڵی پرۆسەی سیاسیی کوردستانەوە کە سەرەنجام ھیچ ئیعتیبارێک بۆ ویستی ئاڵوگۆڕی دیموکراسyیانەی دەسەڵات و بۆ ناوبانگی دامەزراوەکانی ھەرێمی کوردستان ناھێڵێتەوە و شەرعییەتی حکومەتی ھەرێمی کوردستانیش کە ئێستا خۆی کاربەڕێکەرە، دەخاتە ژێر پرسیاری جدییەوە.
مەکتەبی سیاسی ئەم جۆرە ھەوڵانەی دواخستن بە پاشقولگرتن لە ئیستیحقاقی دیموکراسی دەزانێت و ھیچ پاساوێکی بۆ نییە تەنیا رەچاوکردنی بەرژەوەندیی تەسکی ئەوانە نەبێت کە خۆیان لە پرۆسەی ھەڵبژاردن دەدزنەوە و بەدوای دەرچەیەکی ناڕەوادا دەگەڕێن کە زۆرینەیەکی زۆرەملێ و پێشوەختی مسۆگەرکراویان بۆ دابینبکاتەوە. ھەر بۆیە رایدەگەیەنێت ھەرگیز بەشێک نابێت لە کەینوبەینی ژێربەژێر و پێشوەختیش ھەموو کۆبوونەوەیەک بەمەبەستی دواخستنی ھەڵبژاردن رەتدەکاتەوە.
بڕیاری کۆبوونەوەکەی دەباشان ئەوەیە کە یەکێتی بۆ پارێزگاری لە مافی دیموکراسیی گەلەکەمان:
- بە یاداشتی فەرمی و دیداری راشکاو و جددی دۆستانی پرۆسەی سیاسیی کوردستان، عێراق و کۆمەڵی نێودەوڵەتی و نەتەوە یەکگرتووەکانیش لەم پەرۆشییە دیموکراسییەی خۆی ئاگادار دەکاتەوە.
- بە کۆدەنگیی نیشتمانیی لەگەڵ ھێزە کوردستانییەکانی داکۆکیکار لە پابەندبوون بەوادەی ھەڵبژاردن، یەکڕیزی و دیموکراسی پتەوتر دەکات.
- پەنا بۆ سکاڵای یاسایی دەبات و بەگوێرەی دەستووری عیراق و یاسا بەرکارەکانی، داکۆکی لەم مافەی میللەتەکەمان دەکات.
ھەروەک بانگەوازی نیشتمانی و دیموکراسیی خۆی ئاڕاستەی ھەمووان دەکات لەم خەباتە یاسایی و دیموکراسییەدا پشتیوان و ھاوکاربن.
لە کۆتاییشدا کۆبوونەوەی مەکتەبی سیاسیی یەکێتییانە، کوردانە و دیموکراسییانە رووی کردە:
رای گشتیی کۆمەڵانی خەڵکی کوردستان
و دەنگدەرانی تازەی پرۆسەی ھەڵبژاردن کە بۆ یەکەمینجارە ئەم ئیستیحقاقە دیموکراسییە پیادە دەکەن، با پێکەوە داکۆکی لە ئەزموونی دیموکراسیی کوردستان بکەین و ئەرکی راستکردنەوەی رێڕەوی حوکمڕانی خۆماڵی سەربخەین کە تەنیا بە ھەڵبژاردنێکی بێگەرد و لە وادەی خۆیدا دێتەدی.
بۆ پێشەوە بەرەو سەرکەوتنی بژاردەی ھەڵبژاردن و دەربازکردنی قەوارەی ھەرێم لە ھەڕەشەی چەقبەستن و بێئیعتبارکردنی دامەزراوەکانی.
مەکتەبی سیاسیی یەکێتیی نیشتمانیی کوردستان
١/٥/٢٠٢٤
