ئەمڕۆ یەکشەم، ٥ی ئایاری ٢٠٢٤، وەزارەتی دارایی و ئابووری حکوومەتی هەرێمی کوردستان، یەکەمین کۆنفرانسی دڵنیایی لە هەرێمی کوردستان ساز کرد.
ئاوات جەناب نووری وەزیری دارایی و ئابووری لە وتارێکدا کە لە کۆنفرانسەکەدا پێشکەشی کرد، ئاماژەی دا، کە لە هەرێمی کوردستاندا نزیکەی ٣٠٠ هەزار کەس ئۆتۆمبێل و پڕۆژەکانیان لە کەرتی دڵنیایی تۆمار کردووە.
بەپێی داتاکانی بەڕێوەبەرایەتی گشتی دڵنیایی سەربە وەزارەتی دارایی و ئابووری، لە هەرێمی کوردستان هەشت کۆمپانیای دڵنیایی خۆماڵی، لقی شەش کۆمپانیای دڵنیایی عێراقی (کەرتی تایبەت) و هەروەها دوو کۆمپانیای نیشتمانیی عێراقی لقیان لە هەرێمی کوردستان هەیە.
بەگوێرەی مەرجە نوێیەکانی حکوومەتی عێراق سەرمایەی کۆمپانیای دڵنیایی نابێت لە ١٥ ملیار دینار کەمتر بێت.
هەر کەس و دامەزراوەیەک دەتوانێت بەشداری لە کۆمپانیایەکی دڵنیاییدا بکات، خۆی یان ئۆتۆمبێلەکەی یان خانوو و پڕۆژەکەی، لە کەرتی دڵنیاییدا تۆمار بکات و بەشدارییەکەش ئارەزوومەندانەیە.
