سەرچاوەیەکی ئاگادار لە زانکۆی هەڵەبجە بۆ زێدپرێس ئاشکرای کرد، ئەمڕۆ سێشەم، ٧ی ئایاری ٢٠٢٤، ئوسامە ئەشرەف مامۆستا لە بەشی جوگرافیای زانکۆی هەڵەبجە، لەسەر سکاڵای سەرۆکی زانکۆکە و بەتۆمەتی تەشهیرکردن لەڕێگەی نووسینی پۆست و کۆمێنت لە تۆڕی کۆمەڵایەتی فەیسبووک دەستگیر کراوە.
دوابەدوای دەستگیرکردنی مامۆستاکە، ژمارەیەک لە مامۆستا و قوتابیانی زانکۆی هەڵەبجە و چالاکانی دەڤەرەکە، لەڕێگەی تۆڕە کۆمەڵایەتییەکانەوە، دەستیان بە دەربڕینی ناڕەزایەتی و نیگەرانی بەرانبەر دەستگیرکردنی مامۆستاکە کردووە و داوای دەستبەجێ ئازادکردنی دەکەن.
ئەوان بانگەشەی ئەوە دەکەن، مامۆستا دەستگیرکراوەکە، کە بەپێی بەدواداچوونی زێدپرێس، لەشێوەی تەنز و توانجدا لە تۆڕی کۆمەڵایەتی فەیسبووک دەنووسێت، تەشهیری بە کەسێکی دیاریکراو نەکردووە و دەستگیرکردنیشی لەسەر نووسین، وەک پێشێلکاری بەرانبەر بە ئازادی ڕادەربڕین و مافەکانی مرۆڤ لێکدەدەنەوە.
هەر ئەمشەو، ڕێکخراوی سروشتی کوردستان لە ڕاگەیەندراوێکدا، بەئاماژەدان بەوەی کە مامۆستا دەستگیرکراوەکە، ئەندامێکی ڕێکخراوەکەیانە، ڕایگەیاند، مامۆستا ئوسامە ئەشرەف، ئەندام و بەڕێوەبەری ناوەندی ڕاوێژکارانی ڕێکخراوی سروشتی کوردستان، لەسەر سکاڵای سەرۆکی زانکۆی هەڵەبجە و بەهۆی چەند پۆست و کۆمێنتێکی تەنزئامێز و دژە گەندەڵی لە فەیسبووک و بە ماددەی دی مۆبایل دەستگیرکراوە.
ڕێکخراوی سروشتی کوردستان لە ڕاگەیەندراوەکەدا دەڵێ: “ئەمەی ڕوویداوە پێشهاتێکی مەترسیدارە و خنکاندنی دەنگە ئازاد و خاوەن هەڵوێستەکانە و مەترسییەکی گەورەیە لەسەر ئازادیی نووسین و ڕادەربڕین و ڕووبەڕووبوونەوەی گەندەڵی لە کوردستان”.
لەو ڕوانگەیەوە، وێڕای داوای دەستبەجێ ئازادکردنی مامۆستاکە، داواش لە ڕێکخراوەکانی کۆمەڵگەی مەدەنی و مامۆستایانی هاوپیشەی دەکەن، “بێدەنگ نەبن لەئاست ئەم پێشهاتە مەترسیدارە، و هەوڵەکان چڕکەینەوە کە زیندان نەبێتە جێگەی کەسانی ئەکادیمی و چالاکوان و پارێزەرانی ژینگە.”
