ئەمڕۆ یەکشەم، ١٩ی ئایاری ٢٠٢٤، ئیبراهیم ڕەئیسی سەرۆککۆماری ئێران، بەشداری لە کردنەوەی بەنداوێک لە پارێزگای تەورێز کرد و بە هێلیکۆپتەرێک بەرەو تاران گەڕایەوە. بەگوێرەی میدیا فەرمییەکانی ئێران، لەکاتی گەڕانەوە و بەهۆی ناجێگری کەشوهەواوە، هێلیکۆپتەرەکە تووشی ڕووداوێک بووە، کە تا ئێستا چارەنووسی ڕەئیسی و سەرنشینەکانی دیکەی هێلیکۆپتەرەکە دیار نییە.
جگەلە ئیبراهیم ڕەئیسی سەرۆککۆماری ئێران، هەریەک لە حوسێن ئەمیر عەبدوڵاهیان وەزیری دەرەوە، ئایەتوڵا ئەلهاشم پێشنوێژی پارێزگای تەورێز و مالیک ڕەحمەتی پارێزگای تەورێز لەناو هێلیکۆپتەرەکەدا بوون.
میدیای فەرمی ئێران ڕایگەیاندووە، بەهۆی سەختی ناوچەکە و ناجێگری کەشوهەواوە، تیمەکانی فریاگوزاری تەنیا دەتوانن لەسەر زەوی بەدوایدا بگەڕێن و توانای گەڕان بە ڕێگەی هێلیکۆپتەر و ڕێگای ئاسمانی نییە.
ئەو ناوچەیەی هێلیکۆپتەرەکەی تێدا تووشی ڕووداوەکە بووە، ناوچەیەکی سەختی کوێستانییە و نزیکەی دوو کاتژمێر لە تەورێزەوە دوورە.
ناوەندەکانی کەشناسی، ئاماژەیان بەوە کردووە، کە لەماوەی دوو کاتژمێری داهاتوودا، لەگەڵ هاتنی بارستە هەوایەکی نوێ، پێشبینی دەکرێت ساردییەکی زۆر ناوچەکە بگرێتەوە و ئەوەش ئاستەنگی زیاتر بۆ تیمەکانی فریاگوزاری دروست دەکات.
