لە ١٤ی تەمووزی ٢٠٠٠دا، پێنج ئەندامی حزبی کۆمۆنیستی کرێکاریی لە شاری سلێمانی و لەلایەن هێزێکی چەکداری یەکێتیی نیشتمانیی کوردستانەوە کوژران و هەر ئەوکاتیش دەستیان بەسەر بارەگاکانی حزبەکەدا گرت.
موحسین کەریم ئەندامی مەکتەبی سیاسی حزبی کۆمۆنیستی کرێکاریی کوردستان و سەرنووسەری هەفتەنامەی ئۆکتۆبەر کە لەلایەن حزبی کۆمۆنیستی کرێکارییەوە بڵاودەکرێتەوە، لە وتارێکدا باسی لە ڕووداوەکانی پێش تیرۆرکردنی ئەندامانی حزبەکەیان کردووە.
موحسین کەریم لە وتارەکەیدا دەنووسێت، “پێش ڕووداوەکە سەردانی حزبی شیوعی و حزبی زەحمەتکێشانمان کرد بۆ ئەوەی دەوریان هەبێت لە پێشگرتن بەو پیلانگێڕییەی یەکێتی دژی حزب. سەردانی کۆمیتەی محەلی سلێمانی حزبی شیوعیم کرد. باسی ئەوەم کرد کە یەکێتی پیلانێکی وای هەیە و داوا دەکەین ئێوە دەورتان هەبێت لە پێشگرتن بەو تاوانەی یەکێتی دەیەوێ دژی حزبی ئێمە ئەنجامی بدات”.
ئەندامەکەی مەکتەبی سیاسی حزبی کۆمۆنیست درێژە بە گێڕانەوەکەی دەدات و دەڵێ: “باشم بیرە ئەوکات لەگەڵ بەڕێز ئەحمەد حامد دانیشتم و بەڵێنیدا هەوڵی خۆیان بدەن، بەڵام ئیتر هەرئەوە بوو. هیچمان نەدی. جا ئایا ئەوان هەوڵیان داوە یان نا، ئێمە ئاگادارنەکراین، لەکاتێکدا من بەڕەسمی چوومە بارەگاکەیان و داوام کرد بکەونە نێوانمانەوە! هەر لەوێدا باسی هەڵوێستی قادر عەزیزیشم کردووە، کاتێك من و خەسرەو سایە چووینە لای و داوامان کرد کە ئەوانیش هەوڵی خۆیان بدەن بۆ پێشگرتن بەو پیلانگێڕییە، بەڵام قادر عەزیز لە وەڵامدا گوتی: وەڵا هیچ ناکرێ، مام جەلال لێرە نییە، ئەو کابرایە (واتە نەوشیروان) سواری سەری خۆی بووە و دوای ئێوە لە ئێمەش دەدات!”.
لە ١٤ی تەمووزی ٢٠٠٠دا، پێنج ئەندامی حزبی کۆمۆنیست بەناوەکانی محەمەد مستەفا، ناسراو بە کەریم، ئومێد نیکبین، ئیبراهیم محەمەد ناسراو بە هاوکار، هاوڕێ لەتیف و عەبدولباست موحسین ناسراو بە شێخ عەبدول، لەلایەن یەکێتیی نیشتمانییەوە لە شاری سلێمانی تیرۆرکران و لەوکاتەوە تا ئێستا، حزبی کۆمۆنیست نەوشیروان مستەفا بە سەرکردایەتیکردنی ئەو تاوانە تۆمەتبار دەکات.
