پێشنیوه‌ڕۆی ئه‌مڕۆ ١٦ی تشرینی دووەمی ٢٠٢٤، نێچیرڤان بارزانی، سه‌رۆكی هه‌رێمی كوردستان، به‌شداریی له ڕێوڕه‌سمی ده‌رچوونی خولی چواره‌می پێگه‌یاندنی ئه‌فسه‌ران له كۆلێژی سه‌ربازیی قه‌ڵاچوالاندا كرد.
سەرۆکی هەرێمی کوردستان لە ڕێوڕەسمەکەدا وته‌یه‌كی پێشكه‌ش كرد،
ئه‌مه ده‌قه‌كه‌یه‌تی:
دەرچووانی خۆشەویست،
دایكوباوك و كه‌سوكاری ئازیزی ده‌رچووان،
ئاماده‌بووانی به‌ڕێز
ڕۆژتان باش
هه‌موو لایه‌كتان به خێر بێن بۆ ڕێوڕه‌سمی ده‌رچوونی خولی چواره‌می پێگه‌یاندنی ئه‌فسه‌ران له كۆلێژی سه‌ربازیی قه‌ڵاچوالان.
به‌خێرهاتنێكی تایبه‌تیی شاناز خان، خاتوونی یه‌كه‌می عێراق ده‌كه‌م كه له‌م ڕێوڕه‌سمه‌دا له‌گه‌ڵ ئێمه به‌شداره، زۆر به‌خێر بێت.
جێی شانازی و خۆشحاڵییه‌كی زۆری هه‌موومانه، لە سایه‌ی ئەم دامەزراوە سەربازییە پێشكه‌وتووه‌دا، بەشداری له ئاهەنگی دەرچوونی پۆلێکی نوێی پارێزەرانی نیشتمان و به‌شێكی گرنگ و سه‌ره‌كی له دروستکەرانی داهاتووی گەشی کوردستان و عیراق، ده‌كه‌ین. ئەمڕۆ ڕۆژێکی تایبه‌ته بۆ هەرێمی کوردستان و بۆ عێراق، کە بەرهەمی ماندووبوون و ڕه‌نجی گەورەی دەرچووان و مامۆستایانی بەڕێزیان، دەبینین.
زۆر خۆشحاڵم كه ده‌بینم (769) گه‌نجی وڵاته‌كه‌مان، به گوڕوتینێكی نوێوه، چه‌كدار به زانست و دیسپلینی سه‌ربازی، له‌م كۆلێژه به توانایه ده‌رده‌چن. ئه‌وه‌ی زیاتر بۆ هه‌موومان مایه‌ی خۆشحاڵی و شانازییه، ئه‌وه‌یه كه (48) ده‌رچووان له‌وانه‌ی كه ئه‌مڕۆ ده‌رچوون، خانمن. ئه‌وان، ئێستا، دوای نۆ مانگ خوێندن و ڕاهێنان ده‌رده‌چن و پله‌ی مولازم وه‌رده‌گرن. خوێنێكی نوێ به به‌ر هێزی پێشمه‌رگه‌ی كوردستاندا ده‌كه‌ن. دڵنیاین، ئێستا كه خه‌ڵكی كوردستان ئه‌م دیمه‌نانه ده‌بینن، به شانازییه‌وه، هه‌ست به سه‌ربه‌رزی ده‌كه‌ن.
له دڵه‌وه، گەرمترین پیرۆزبایی و دەستخۆشی پێشکەش بە دەرچووانی ئازیز و خێزانه‌كانیان دەکەم کە لە ته‌واوی ڕێگای خوێندن و ڕاهێنانیاندا، پاڵپشت و هاندەریان بوون. هەروەها، سوپاس و پێزانینی تایبەت و بێپایانی خۆم پێشکەش بە مامۆستایانی دڵسۆز و ماندوونەناس و به‌رپرسانی کۆلێژی سەربازی دەکەم، بۆ هەوڵی بەردەوام و بێوچانیان لە ئامادەکردن و پێگەیاندنی ئەم نەوە ئومێدبه‌خشه و دڵسۆزه بۆ كوردستان و عێراق.
دەرچووانی خۆشەویست و ئازیز،
خواست و بژارده‌ی ئێوە بۆ په‌یوه‌ندیكردن بە کۆلێژی سەربازییه‌وه، دوای تەواوکردنی خوێندنی زانکۆ، نیشانەی دڵسۆزی و پێگەیشتنی فیکری و هەستی قووڵی نیشتمانی و بەرپرسیارێتیی بەرزی ئێوه‌یه. ئێوە ڕێگای ئاسانتان هەڵنەبژاردووە، بەڵکو ڕێگایه‌كی سه‌ختی شکۆ و سەربەرزیتان هەڵبژاردووە كه ڕێگای خزمەتكردنی نیشتمان و پاراستنی دەستکەوت و بەها باڵاكانی گەلەکەمانه.
خوێندن و پێشینەی ئەکادیمی و پسپۆڕیی زانستیتان، سەرمایەیەکی زۆر گەورەیە له ژیانتاندا. بێگومان، هێزە چەکدارەکانمان دەوڵەمەند دەکات. توانا و لێهاتوویییان، بۆ ڕووبەڕووبوونەوەی ئاڵنگارییەکانی سەردەم و داهاتوو، بەهێزتر و بەرزتر دەکاتەوە. ئەمە سەرەتای وەرچەرخانێکی گرنگ و پێویستە، لە مێژووی پێشمه‌رگایه‌تی و هێزە چەکدارەکانی هەرێمی کوردستاندا.
بە تایبەتی و بە شانازییەکی زۆرەوە، بەشداریی كچان و ژنانی کوردستانی لە ڕیزەکانی پێشمه‌رگه و هێزە چەکدارەکانمان، له‌م ڕۆژه‌دا بەرز دەنرخێنم. ئافره‌تانی کوردستان، بە درێژاییی مێژووی خەباتی گەلەکەمان، سەلماندوویانه کە هاوبەشی سەرەکی و کاریگەرن لە بنیاتنانی نیشتمان و بەرگریکردن لە خاک و وڵات.
له‌مپێناوه‌دا، قوربانیی زۆریان داوه كه مایه‌ی ڕێز و شانازین. بوونی ژن لە دامەزراوەی سەربازی و ئه‌منیدا، تەنها نیشانەی پێشکەوتنی کۆمەڵگاکەمان نییە، بەڵکو بەڵگەی باوەڕی قووڵی ئێمەیە بە یەکسانی و دادپەروەری و هاوبەشیی ڕاستەقینە، لە هەڵگرتنی بەرپرسیارێتیی نیشتمانی و ئه‌ركه گرنگەکاندا.
مێژووی پێشمەرگە، تۆمارێکی زێڕین و پڕ شانازییە لە قارەمانێتی، فیداکاری و قوربانیدان له‌پێناو كوردستان. لە ڕۆژی دامەزراندنییەوە تا ئەمڕۆ، پێشمه‌رگه، ئەم هێزە شكۆداره، بەردەوام قەڵغانێکی پۆڵایین و پتەو بووە، بۆ پاراستنی كوردستان و ده‌سكه‌وته‌كانی. بە درێژاییی دەیان ساڵی ڕابردوو، شەڕی بەرگریکردن لە ئازادی، مافە ڕەواکان و شكۆی گەلی كوردستانیان کردووە. کاروانێکی درێژی شەهیدانی سەربەرز و قارەمانیان پێشکەش به كوردستان کردووە. ئەمڕۆش بە هەمان گیانی نیشتمانپەروەری و فیداکارییەوە، لە پاراستنی دەستکەوتە دیموکراسی و دەستوورییەکانی گەلەکەمان، بەردەوامن و كۆڵ ناده‌ن.
له‌م ڕۆژه‌دا سه‌ری ڕێز و نه‌وازش بۆ هه‌موو ئه‌و شه‌هیدانه داده‌نوێنین كه له‌پێناو به‌رگریكرن له كوردستان و ده‌سكه‌وته‌كانیدا، خوێنی خۆیان به‌خشی، هه‌میشه یادیان به زیندوویی ده‌مێنێته‌وه.
ده‌رچووانی ئازیز،
کچان و کوڕانی خۆشه‌ویست،
دەرچوونی ئەمڕۆتان کۆتاییی ڕێگا نییە، بەڵکو سەرەتای قۆناغێکی نوێ و گرنگی ژیانتانه. سەرەتای ڕێگایەکی پڕ لە بەخشین، له قوربانی و خزمەتکردن بە گەل و نیشتمان. ئەو زانست و زانیاری و ئەزموونانەی کە لەم کۆلێژە ڕه‌سه‌نه‌دا بەدەستتان هێناوە، چەک و ئامرازێکی بەهێزن، بۆ خزمەتکردنی نیشتمان و گەلەکەتان. بەشداری و په‌یوه‌ندیكردنتان بە دامەزراوەی سەربازییه‌وه، بەرپرسیارێتییەکی مێژوویی و نیشتمانیی گەورە، دەخاتە سەر شانتان بۆ پاراستنی ئاسایش، ئارامی و سەقامگیریی وڵاته‌كه‌مان.
هه‌ر له‌م ڕۆژه‌دا یادی سه‌رۆك مام جه‌لال به‌رز ده‌نرخێنین كه له ساڵی 1992ه‌وه بیری له‌وه كردۆته‌وه تا ئه‌م كۆلێژه سه‌ربازییه دابمه‌زرێت له‌پێناو خزمه‌تكردنی كوردستان، له‌پێناو خزمه‌تكردنی وڵاتدا.
ئێمە لە هەرێمی کوردستان باوەڕێکی قووڵ و پتەومان هەیە کە پێشمه‌رگه و هێزە چەکدارەکانمان، دەبێت و پێویسته دامەزراوەیەکی نیشتمانی و پیشەییی سەربەخۆ بن. دوور بن لە هەموو جۆرە ناكۆكی و ململانێی سیاسی و حزبی. ئەم هێزانە، ده‌بێ سەر بە نیشتمان و سه‌ر به گەلی کوردستان بن، بە هەموو پێکهاتە جیاوازه‌كانی كوردستانه‌وه.
هەروەها پێشمه‌رگه بەشێکی گرنگ و سەرەکین لە سیستەمی بەرگریی عێراقی. بۆیه ئه‌ركی عێراقه، له هه‌موو ڕوویه‌كه‌وه پشتگیری بكات بۆ به‌هێزكردنی پێشمه‌رگه. ئێمە بە شێوەیەکی بەردەوام و جددی، کار دەکەین بۆ بەهێزکردنی توانا و پەرەپێدانی کارامەیی و لێهاتووییی پێشمه‌رگه، بۆ ئەوەی بتوانن بە باشترین شێوە، ڕووبەڕووی هەموو ئاڵنگاری و هەڕەشەیەک ببنەوە و وه‌ك هه‌میشه قه‌ڵغانی پۆڵایینی پاراستنی كوردستان بن.
پێشمه‌رگه قاره‌مانه‌كانی كوردستان و هێزەکانمان لە شەڕی دژەتیرۆر و بەرەنگاربوونەوەی ڕێکخراوی تیرۆریستیی داعشدا، بە کردەوە و به خوێنی خۆیان سەلماندیان کە لە ئاستی بەرپرسیارێتیی مێژوویی و نیشتمانیدان. خوێنی پێشمه‌رگه له هه‌موو شوێنێكی كوردستاندا تێكه‌ڵ بوو، یه‌ك كه‌س پرسیاری نه‌ده‌كرد كامه سه‌وزه، كامه زه‌رده، هه‌موویان له‌پێناو خزمه‌تكردن به وڵات و له‌پێناو خزمه‌تكردن به كوردستاندا خوێنیان به‌خشی، فیداكارییان كرد و خه‌باتیان كرد. نموونەیەکی باش و بێوێنەیان پێشکەش کرد، لە قاره‌مانێتی، پیشەگەری، ئازایەتی، گیانی قوربانیدان و فیداکاری بۆ وڵات. له‌م قۆناغه‌شدا كه هێشتا تیرۆر و توندڕه‌وی، هه‌ڕه‌شه‌ی ڕاسته‌قینه‌ن، جه‌خت له گرنگیی به‌رده‌وامیی هه‌ماهه‌نگی و هاریكاریی هاوبه‌شی پێشمه‌رگه و سوپای عێراق و هێزه‌كانی هاوپه‌یمانان ده‌كه‌ینه‌وه.
هه‌روه‌ها پێویستە له‌م ڕۆژه‌دا سوپاس و پێزانینی قووڵی خۆمان دووپات بكه‌ینه‌وه بۆ هێزەکانی هاوپەیمانیی نێودەوڵەتیی دژی داعش، بۆ پشتگیری و هاوکاریی بەردەوامیان بۆ عێراق و هەرێمی کوردستان. پێزانینی تایبەتمان هەیە بۆ یارمه‌تیدان و پشتگیرییان لە هەوڵەکانی چاکسازی و یەکخستنه‌وه‌ی پێشمه‌رگه لەژێر چەتری وەزارەتی پێشمەرگەی حكوومه‌تی هه‌رێمی كوردستاندا بۆ ئه‌وه‌ی ببن به هێزێكی نیشتمانی و پارێزه‌ری ده‌ستكه‌وته‌كانی هه‌رێمی كوردستان بن به هه‌موو پێكهاته‌كانییه‌وه.
ڕاسته له‌م قۆناغه و له‌م ڕێگه‌یه‌دا كێشه و گرفت له‌به‌رده‌م پرۆسه‌كه‌دا هه‌ن، به‌ڵام وێڕای هه‌موو شتێك، هه‌نگاوه‌كان ڕاسته هێواشن، به‌ڵام به‌ره‌وپێشچوونێكی باش هه‌یه. هه‌ر لێره‌شه‌وه، گه‌لی كوردستان و دۆستانمان له هاوپه‌یمانیی نێوده‌وڵه‌تی دڵنیا ده‌كه‌ینه‌وه كه ئیراده و خواستی جدییمان هه‌یه و تا سه‌ركه‌وتن و یه‌كخستنی پێشمه‌رگه، كۆڵ ناده‌ین و به‌رده‌وام ده‌بین.
خوشک و برایانی بەڕێز،
كێشه و ئاڵۆزییه‌كانی ڕۆژهەڵاتی ناوەڕاست، هەڕەشە لە ئاسایش و سەقامگیریی عێراق و هەرێمی كوردستان و ناوچه‌كه به‌گشتی دەکه‌ن. ئێمە لە هەرێمی کوردستان، جەخت لەسەر پێویستیی دوورخستنەوەی عێراق لە ململانێ و کێشە هەرێمییەکان دەکەینەوە. عێراق پێویستی بە ئارامی، سەقامگیری و گەشەپێدانی بەردەوامە، نەک تەنگژە و ناکۆکی و ململانێی زیاتر.
دوای مێژوویه‌كی پڕ له ئازار، پڕ له مه‌ینه‌تی و وێرانكاری، به ده‌ستی جه‌نگ و شه‌ڕه یه‌ك له‌دوای یه‌كه‌كانه‌وه، عێراق ئێستا پێویستی به ئارامی و سه‌قامگیری هه‌یه. بۆ ئه‌وه‌ی بتوانێت خێروبێر و ده‌وڵه‌مه‌ندیی وڵاته‌كه‌یان، بۆ بنیاتنانه‌وه و گه‌شه‌پێدان و پێشخستنی هه‌موو كه‌رته‌كانی ژیان، به‌كار بهێنێت. خه‌ڵكی عێراق و هه‌رێمی كوردستان، به هه‌موو ناوچه‌كانیانه‌وه، شایانی ژیان و خزمه‌تگوزاریی زیاترن، نه‌ك تێوه‌گلان له ئاڵۆزی و ئاشووبه‌كان كه ئه‌مڕۆ له ناوچه‌كه‌دا هه‌ن.
لێره‌وه، دووپاتی ده‌كه‌ینه‌وه كه هه‌رێمی كوردستان، به فاكته‌ری ئارامی له ناوچه‌كه‌دا ده‌مێنێته‌وه و ده‌ستی هاریكاری بۆ هه‌موو لایه‌ك درێژ ده‌كات، له‌پێناو پاراستنی ئارامی و سه‌قامگیری و پێكه‌وه‌ژیانی ئاشتییانه‌ی هه‌مووان.
ئەزموونی دەیان ساڵەی ئێمە لە هەرێمی کوردستان، فێری کردووین کە دیالۆگ، لێکگەیشتن و دانوستانی بەردەوام، تەنها ڕێگەی گونجاو و دروستن بۆ چارەسەرکردنی ناکۆکییەکان و تێپەڕاندنی قەیرانەکان. ئێمە باوەڕمان وایە کە پته‌وكردنی هاوکاری و هەماهەنگی لەنێوان هەموو پێکهاتەکانی عێراقدا، گەرەنتیی ڕاستەقینەن بۆ بنیاتنانی عێراقێکی دیموکراتی فیدراڵ کە ڕێز لە فرەیی و جیاوازییەکان بگرێت و ماف و ئازادییەکانی هەموو پێکهاتەکان بپارێزێت.
به‌ڕێزان،
به ڕه‌چاوكردنی قۆناغی سیاسیی هەستیاری دوای هەڵبژاردنی په‌رله‌مانی كوردستان كه هه‌ڵبژاردنێكی سه‌ركه‌وتوو بوو، نزیكه‌ی حه‌فتا و دوو له سه‌دی گه‌لی كوردستان به‌شدارییان له‌و هه‌ڵبژاردنه‌دا كرد كه به هه‌موو پێوه‌رێك سه‌ركه‌وتنی كوردستان بوو، داوا لە هەموو هێزە سیاسییە براوەکان دەکەم کە بەرژەوەندیی باڵای نیشتمان لە سەرووی هەموو شتێكه‌وه دابنێن. گفتوگۆیه‌كی جددی، بەرپرسیارانە و بنیاتنەر دەست پێبکەن، بۆ پێکهێنانی حکوومەتێکی بەهێز و کارا. حكوومه‌تێك کە وه‌ڵامگۆی چاوه‌ڕوانییه‌كانی خه‌ڵك بێت. بتوانێت سەرکەوتووانه ڕووبەڕووی مه‌ترسی و ئاڵنگارییەكانی ئێستا و داهاتوو ببێتەوە.
هەروەها جەخت لەسەر پێویستی و گرنگیی چارەسەرکردنی کێشه‌كانی هه‌رێمی كوردستان و به‌غدا لەسەر بنەمای دەستوور و ڕێککەوتنه سیاسییه‌كانی هه‌رێمی كوردستان و به‌غدا دەکەمه‌وه. عێراقێك كه بتوانێت به‌رگه‌ی مه‌ترسییه‌كانی دۆخی ئاڵۆزی ناوچه‌كه بگرێت، پێویسته بێ جیاوازی، عێراقی هه‌موو پێكهاته‌كان بێت. عێراقیێك كه بتوانێت له‌ڕووی كرده‌یییه‌وه بۆ هه‌موو عێراقییه‌كان بێت، هه‌مووان هه‌ست بكه‌ن له بڕیاردان و به‌ڕێوه‌بردنی سیاسی و كارگێڕیی وڵاتدا، هه‌م له هه‌رێمی كوردستان و هه‌م له عێراقیشدا وه‌ك یه‌ك، به‌شدار و هاوبه‌شن و خۆیان به خاوه‌نی عێراق بزانن
جارێکی تر له دڵمه‌وه، پیرۆزبایی له دەرچووان و خێزان و كه‌سوكاری بەڕێزیان دەکەم. سوپاس و پێزانینی تایبەت، بۆ فه‌رمانده و به‌رپرسانی کۆلێژی سەربازیی قه‌ڵاچوالان و هەموو یه‌ك به یه‌ك مامۆستایان و ڕاهێنەران، بۆ هەوڵی دڵسۆزانەیان و ماندووبوونی بەردەوامیان، لە ئامادەکردنی ئەم نەوە نیشتمانپەروەرە كه ئومێدی كوردستان و داهاتووی وڵاته‌كه‌مانن.
هیوادارم هه‌موو لایه‌كتان سەرکەوتوو بن لە خزمەتکردنی نیشتمان و گەلەکەمان. له پاراستنی ته‌بایی و پێكه‌وه‌یی، له بره‌ودان به كولتووری جوانی یه‌كترقبووڵكردن و پێكه‌وه‌ژیان و لێبورده‌یی له كوردستانی عێراقدا كه ته‌نها ئه‌وه ڕێگه‌مانه بۆ داهاتوو. خوای مه‌زن وڵاته‌كه‌مان بپارێزێت
سڵاو و دروود له گیانی پاكی شه‌هیدان
سڵاو له ئێوه و هیوای ڕۆژێكی خۆشتان بۆ ده‌خوام،
هه‌موولایه‌كتان به‌خێر بێن، زۆر سوپاس..
