میدیای فەرمی عێراق، ئەمڕۆ دووشەم، ٢١ی تەممووزی ٢٠٢٥، لە زاری باسم عەوادی گوتەبێژی حکوومەتی عێراقەوە ڕایگەیاند: بڕیارەکەی ئەنجوومەنی وەزیرانی عێراق کە هەردوو حکوومەتی عێراق و هەرێمی کوردستان ڕەزامەندییان لەسەر داوە، “ڕووداوێکی گەورەیە و کۆتایی بە گرفتی چەندین ساڵە لە پێوەندی دارایی لەسەر بنەمای لێکتێگەیشتنە سیاسییەکان دەهێنێت و قۆناغێکی نوێ دەهێنێتەکایەوە، کە دەستوور و پابەندییە یاساییەکانی بودجە دەخاتە پێش هەر ڕێککەوتن و تێگەیشتنێکی سیاسییەوە”.
گوتەبێژەکەی حکوومەتی عێراق زیاتر دەڵێ: “بڕیارە پشتئەستوورە بەو بنەمایانەی کە لە بودجەی سێ ساڵەدا دەقیان لەسەر کراوە، ئەمجارە بەشێوەیەك كارایە، كە یاسا دەخاتە سەروو هەموو ئاڵنگارییەکی سیاسی و ئەوەش وەرچەرخانێكی نوێیە لە سیاسەتی حکوومەتدا”.
“بەپێی ناوەڕۆکی بڕیارەكە، حكوومەتی هەرێم پابەند دەكرێت بە ڕادەستكردنی 230 هەزار بەرمیل نەوتی ڕۆژانە بە كۆمپانیای سۆمۆ و 50 هەزار بەرمیلیش بۆ بەكارهێنانی ناوخۆیی لە پارێزگاكانی هەرێم، سۆمۆ هەناردەی نەوتەكە دەگرێتە ئەستۆ و داهاتەكەی دەخاتە گەنجینەی گشتی كە گەنجینەیەكی یەكگرتووە”، باسم عەوادی وای گوتووە.
ئاماژەی بەوەش کرد: “ئەم ڕێکارە لەگەڵ بڕیارەكەی دادگای فیدڕاڵی لەبارەی بەبانکیکردنی مووچەی فەرمانبەرانی هەرێم یەکدەگرێتەوە؛ خەرجكردنی مووچەی فەرمانبەرانی هەرێمیش لە گەنجینەی فیدڕاڵی و بەپێی یاسای بودجە، گەرەنتی دەكات”.
