مەسعوود بارزانی سەرۆکی پارتی دیموکراتی کوردستان و سەرۆکی پێشووی هەرێمی کوردستان، لە پەیامێکدا سوپاسی گەلی کوردستان دەکات و دەڵێ: “وەک هەمیشە خۆڕاگر بوون”.
ئەمڕۆ سێشەم، ٢٢ی تەممووزی ٢٠٢٥، بارزانی پەیامێکی بڵاوکردەوە، کە تێیدا دەڵێ: “سوپاس بۆ گەلی کوردستان، سەرەڕای هەموو فشارەکان وەک هەمیشە خۆڕاگر بوون، ئێوە نموونەی وەفا و فیداکارین، شانازیتان پێوە دەکەم”.
پەیامەکەی بارزانی، دوای نزیکەی سێ مانگ دێت لە خەرج نەکردنی مووچەی مووچەخۆرانی هەرێمی کوردستان و ناکۆکییەکان لەگەڵ بەغدا، بەتایبەت دوای ئەوەش دێت، کە ئەمڕۆ سێشەم، وەزارەتی دارایی عێراق ڕایگەیاند، دەستیان بە خەرجکردنی مووچە و شایستە داراییەکانی مووچەخۆرانی هەرێمی کوردستان کردووە.
هەر ئەمڕۆ سێشەم، وەزارەتی دارایی و ئابووری هەرێمی کوردستان، بڕی ١٢٠ ملیار دینار لە داهاتی نانەوتی هەرێمی کوردستانی، بۆ سەر هەژماری بانکی وەزارەتی دارایی فیدڕاڵ گواستەوە.
