زێدپرێس
ئەمڕۆ چوارشەم ٢٦ی تەمووزی ٢٠٢٣، کۆمسیۆنی باڵای سەربەخۆی هەڵبژاردنەکانی عێراق ڕایگەیاند، لە بەیانی پێنجشەم ٢٧ی تەمووزی ٢٠٢٣ەوە، ناونووسین بۆ کارمەندانی سەر سندووقەکانی دەنگدان لە سەرتاسەری عێراق دەست پێدەکات.
بەگوێرەی کۆمسیۆن سەرجەم کارمەندان و فەرمانبەرانی مەدەنی، جگە لە کارمەندانی هێزەکانی ئاسایش و سەربازی دەتوانن ناوی خۆیان تۆمار بکەن وەک کارمەندی سەر سندووقەکانی دەنگدان و بۆ هەڵبژاردنی ئەنجوومەنی پارێزگاکانی عێراق.
بەگوێرەی ڕاگەیەنراوی کۆمسیۆنی باڵای سەربەخۆی هەڵبژاردنەکان، لەپاڵ فەرمانبەرانی مەدەنی، خوێندکارانی زانکۆ و پەیمانگاکانیش دەتوانن ناوی خۆیان تۆمار بکەن و سوود لە دەرفەتەکە وەربگرن.
ناونووسین لە ڕێگەی ماڵپەڕی فەرمی کۆمسیۆنی باڵای سەربەخۆی هەڵبژاردنەکانی عێراقەوە دەبێت.
بڕیارە، لە ١٨ی کانوونی یەکەمی ٢٠٢٣، هەڵبژاردنی ئەنجوومەنی پارێزگاکان لە ١٥ پارێزگای عێراق بە کەرکووکیشەوە بەڕێوە بچێت.
