زێدپرێس
بەگوێرەی بەدواداچوونەکانی زێدپرێس و ئەو داتا و ئامارانەی لە ١ی کانوونی دووەمی ٢٠٢٢ تا کۆتایی تەمووزی ٢٠٢٣، لە نەخۆشخانەی فریاکەوتنی ڕۆژئاوای هەولێر تۆمارکراون، لەو ماوەیەدا هەزار و ٢٨٤ حاڵەتی پەلاماردان و گەستنی سەگ تەنیا لەو نەخۆشخانەی شاری هەولێر تۆمار کراون.
جیا لە داتاکانی ئەو نەخۆشخانەیە، حاڵەتەکانی پەلاماردان و گەستنی سەگ لە نەخۆشخانەکانی دیکەیشدا، وەک فریاکەوتنی ڕۆژهەڵاتی هەولێر تۆمار دەکرێن، جگە لە نەخۆشخانە و بنکەکانی تەندروستی لە شارۆچکە و شارەدێیەکانی سنووری پارێزگای هەولێر.
ئامارەکان ڕوونی دەکەنەوە، لە ماوەی ساڵی ڕابردوودا، ٨٠٤ حاڵەتی گەستنی سەگ لە نەخۆشخانەی فریاکەوتنی ڕۆژئاوا تۆمار کراوە و لە شەش مانگی سەرەتای ئەمساڵیشدا ٤٨٠ حاڵەتی دیکەی گەستنی سەگ تۆمار کراون. زۆرترین حاڵەتی گەستنی سەگ لە کانوونی یەکەمی ساڵی ڕابردوو تۆمار کراوە، کە ١٣٢ حاڵەتە و لەماوەی ئەمساڵیشدا بەرزترین حاڵەتی گەستنی سەگ لە کانوونی دووەم تۆمارکراوە، کە ٩٥ حاڵەت بووە.
بەهۆی هەڵکشانی حاڵەتەکانی گەستنی سەگ و بەرزبوونەوەی ژمارەی سەگی بەڕەڵڵا لە گەڕەکەکانی ناوەندی شاری هەولێردا، لە حوزەیرانی ئەمساڵەوە دەست بە گواستنەوە و پەنادانی سەگی بەڕەڵڵا و بێخاوەن لە شەڵتەرێکی تایبەت کراوە.
لە ماوەی ڕابردوودا، چەندین حاڵەتی گیان لە دەستدان بەتایبەت لەناو منداڵان، بەهۆی پەلاماردان و گەستنی سەگەوە تۆمار کراوە.
