زێدپرێس-گەرمیان
سەرچاوەیەکی تایبەت لە بنکەی پۆلیسی زینانە بۆ زێدپرێس ڕایگەیاند، ئەمڕۆ سێشەم ٥ی ئەیلوولی ٢٠٢٣، مەفرەزەیەکی بنکەی پۆلیسی زینانە، هەوڵی دەستگیرکردنی تۆمەتبارێکی داواکراویان داوە، بەڵام تۆمەتبارەکە ڕووبەڕووی پۆلیس بووەتەوە و تەقەی لێکردوون و لە ئەنجامدا کارمەندێکی پۆلیسی زینانە بەناوی تاریق عەبدولڕەحمان بە تەقەی تۆمەتبارەکە بەسەختی بریندارکراوە و بەهۆی سەختی برینەکەیەوە گیانی لەدەستداوە.
تاریق عەبدولڕەحمان مەجید، لەدایکبووی ساڵی ١٩٧٢ و خەڵکی گوندی حەفتەغاری سنووری داقووقە.
بەپێی زانیارییەکانی سەرچاوەکەی زێدپرێس، تۆمەتبارەکە ماوەیەکە داواکراوە و خۆی لە گوندێکی سنوورەکە حەشارداوە، ئەمڕۆ هێزێکی پۆلیسی سەر بە بنکەی پۆلیسی زینانە بۆ دەستگیرکردنی، دەرچوون و تۆمەتبار خۆی بەدەستەوە نەداوە و ڕووبەڕووی هێزەکە بووەتەوە.
سەرچاوەکە گوتیشی، تۆمەتبارەکە دەستگیر نەکراوە.
شارەدێی زینانە سەر بە شارۆچکەی کفری سنووری ئیدارەی سەربەخۆی گەرمیانە.
