زێدپرێس
ئەمڕۆ پێنجشەم، ٥ی تشرینی یەکەمی ٢٠٢٣، مەجید ئەلجماوی باڵیۆزی کۆماری عێراق لە ئەنقەرە ڕایگەیاند، تورکیا ڕەزامەندی دەربڕیوە لەسەر دەستپێکردنەوەی هەناردەکردنی نەوت لە ڕێگەی هێڵی بۆڕی نەوتی عێراق-تورکیا.
ئەلجماوی لە بەیاننامەیەکدا دەڵێ “لایەنی تورکیا ڕەزامەندی دەربڕی لەسەر ئەوەی دەستبەجێ هەناردەکردنی نەوت لە هێڵی بۆڕی نەوتی عێراق – تورکیا دەستپێبکاتەوە”.
ئەو ڕاگەیەنراوە، دوای کۆبوونەوەی دوێنێ چوارشەم لەگەڵ وەزیری وزە و سامانە سروشتییەکانی تورکیا، ئالپ ئەرسلان بایراکتار دێت.
بایراکتار دووپاتی کردەوە کە “تیمەکانی تەکنیکی تورکیا ڕێکارە تەکنیکی و لۆجستییەکانی دەستپێکردنەوەی هەناردەی نەوتی عێراقیان لە ڕێگەی بۆرییەوە تەواوکردووە”، ڕوونیشیکردەوە، “ئێستا ئەو پرسە لە دەستی لایەنی عێراقیدایە”.
وەک ئەوەی ئاژانسی هەواڵی عێراق ئاماژەی داوە، لە بەرانبەردا باڵیۆزی عێراق لە ئەنقەرە، “پێزانینی حکوومەت و گەلی عێراقی بۆ ئەم هەنگاوەی تورکیا” دەربڕی و “ئامادەیی عێراقی بۆ دەستپێکردنەوەی هەناردەی نەوت بەخێرایی” دەربڕی.
جەختیشی کردەوە، “دەستپێکردنەوەی هەناردەکردنی نەوت بەشدارییەکی بەرچاوی لە کرانەوەی ئاسۆی پەیوەندییەکانی عێراق و تورکیا دەبێت، بە شێوەیەک کە بەرژەوەندی هاوبەشی هەردوو وڵاتی دراوسێ و گەشەپێدان مسۆگەر بکات”.
