زێدپرێس
ئەمڕۆ چوارشەم، ١٥ی تشرینی دووەمی ٢٠٢٣، ئەنجوومەنیی شارەوانیی سلێمانی، بەسەرپەرشتیی سەرۆكی ئەنجوومەن کۆبوویەوە. بەپێی ڕاگەیەندراوی کۆبوونەوەکە، تاوتوێی لابردنی زیادەڕۆیی سەر شەقام و شۆستەکانی شارەکە کراوە.
ڕاگەیەندراوەکە جەختی لەسەر “داواکاریی و سكاڵای زۆری هاووڵاتییان سەبارەت بە زیادەڕۆیی لەسەر شۆستە و شەقامەکانی شار” کردووەتەوە، بەتایبەت “شەقامی کانی با، ناو بازاڕی سەرچنار، سەر شەقامی هەواری شار، شەقامی سی مەتری ئازادیی، ناوبازاڕی سلێمانی، شەقامی سالم و چەند شەقامێک تر”.
لەو ڕوانگەیەوە، ئەنجوومەنیی شارەوانیی سلێمانی، ڕایگەیاندووە، کە زیادەڕۆییەکان لە سەر ئەو شۆستە و شەقامانەدا، بوونەتە هۆی درووستبوونی “سیمای ناشارستانی، قەرەباڵغی و ئاستەنگی هاتوچۆ بۆ شۆفێران، نەبوونی ڕێگا بۆ هاتوچۆی پیادەڕەو و کارەساتی مرۆیی لەسەر شەقامەکان” و بۆ ئەو مەبەستە “دەبێت کاری پێویست ئەنجام بدرێت لەلایەن پارێزگای سلێمانی، قایمقامیەت، هێزەکانی پۆلیس و ئاسایش و هاوكارمانبن لە بنبڕكردنی زیادەڕۆییدا”.
