زێدپرێس
ئەمڕۆ یەکشەم، ١٠ی کانوونی یەکەمی ٢٠٢٣، وەزارەتی دارایی عێراق لە ڕاگەیەندراوێکدا، ئاماژەی بەوە کرد، لەژێر ڕێنمایی سەرۆکی حکوومەت و بەدواداچوونی تەیف سامی وەزیری دارایی، ڕۆژی هەینی ٨ی کانوونی یەکەم، وەزارەتی دارایی بە نووسراوی فەرمی ڕەزامەندی دا لەسەر تەرخانکردنی بەبڕی ٧٠٠ ملیار دینار قەرز بۆ دابینکردنی مووچەی فەرمانبەرانی هەرێم.
هەر لە ڕاگەیەندراوەکەدا هاتووە، کە قەرزەکە لە پشکی هەرێم لە بودجەی فیدڕاڵیی عێراق دەگێڕدرێتەوە.
ڕاگەیەندراوەکە دەڵێ، خەرجکردنی ئەو بڕە پارەیە، لە “پەرۆشی وەزارەتەوە دێت”، بۆ جێبەجێکردنی ئەو ڕێکارانەی یاسای بودجەی فیدڕاڵی ژمارە ١٣ی ساڵی ٢٠٢٣دا هاتووە، لەوانەش دەستەبەرکردنی مافە داراییەکانی ئەو کەسانەی شایستەن، هەروەها “وەک پشتڕاستکردنەوەی پەرۆشی حکوومەت بۆ جێبەجێکردنی شایستەکانی فەرمانبەران لە هەرێمی کوردستان و جێبەجێکردنی چاکسازییە داراییەکان بە ئامانجی بەرەوپێشبردنی گەشەی ئابووری”.
