زێدپرێس
لەماوەی مانگی ڕابردوودا، ٩٠٧ منداڵ لە نەخۆشخانەی منداڵبوونی فێرکاری لە شاری سلێمانی لەدایک بوون، کە ٥٠٥ منداڵ بەشێوەی سروشتی و ٤٠٢ منداڵیش بە ڕێگەی نەشتەرگەرییەوە لەدایک بوون.
بەپێی ئاماری بەڕێوبەرایەتی گشتی تەندروستی سلێمانی لەماوەی مانگی ڕابردوودا (١ بۆ ٣٠ی تشرینی دووەمی ٢٠٢٣) لە نەخۆشخانەی منداڵبوونی فریاكەوتنی فێركاری ٢ هەزار و ٢٥٤ نەخۆش سەردانیان كردووە، لەو ژمارەیە هەزار و ٤٨٦ نەخۆش داخڵكراون و چارەسەری پێویستیان بۆ كراوە.
هەر بەپێی داتاکانی بەڕێوەبەرایەتی گشتی تەندروستی سلێمانی، مانگی ڕابردوو ٩٠٧ منداڵ لەنەخۆشخانەی منداڵبوونی فریاكەوتنی فێركاری لەدایك بوون؛ ٤٢١ منداڵ كوڕ و ٤٨٦ منداڵ كچ بوون، لەو ژمارەیەش ٥٠٥ منداڵیان بەشێوەی سروشتی و ٤٠٢ منداڵ لەڕێگەی نەشتەرگەرییەوە لەدایك بوون.
هاوكات لەمانگی ڕابردوودا لەنەخۆشخانەی منداڵبوونی فریاكەوتنی فێركاری ١٩٥ منداڵ لەبەشی نەبەكام داخڵ كراون و ٢٢ حاڵەتی لەدایكبوونی دووانە و ١٠٨ لەبارچوونی منداڵ تۆماركراوە.
