ئەمڕۆ سێشەم، ١٩ی ئازاری ٢٠٢٤، د. لەتیف ڕەشید سەرۆککۆماری عێراق، لەگەڵ جاسم محەمەد عەبوود سەرۆکی دادگای باڵای فیدڕاڵی کۆبۆوە و گفتوگۆیان کرد لەبارەی ناوەڕۆکی بڕیارەکەی دادگای فیدراڵی سەبارەت بە ھەژماری بانکی فەرمانبەرانی ھەرێمی کوردستان کرد.
بەگوێرەی ڕاگەیەندراوی سەرۆکایەتی کۆماری عێراق، د. لەتیف ڕەشید ئاماژەی بەوە کردووە، لەدوای ساڵی ٢٠٠٣ پڕۆسەی سیاسی عێراق لەسەر چەند بنەمایەکی نەگۆڕ داڕێژراوە، کە خواستی سەرکردە سیاسییەکانی لەسەر بووە و لە دەستوردا بەڕوونی ھەرێمی کوردستان و ئەو دەسەڵاتانەی ئێستای پەسندکردووە. هەروەها گوتی: “ھەربۆیە دەسەڵاتدارانی ھەرێم دەسەڵاتی تەواویان بەسەر ھەرێم و ھاووڵاتییاندا ھەیە، بەشێوەیەک کە جگە لە دەسەڵاتە تایبەتەکانی حکوومەتی فیدڕاڵ، دەستوور و یاسا پێشێل نەکات”.
لە بەرانبەردا سەرۆکی دادگای باڵای فیدڕاڵی، ئاماژەی بەوە کرد، “ئەو فەرمانبەرانەی ھەرێمی کوردستان کە بەھۆی کێشەی تەکنیکییەوە دروستکردنی ھەژماری بانکییان دوادەکەوێت، دەتوانن بە کاش مووچەکانیان وەربگرن”.
سەرۆکی دادگای باڵای فیدڕاڵی گوتیشی: “ناردنی پارە بۆ مووچەخۆرانی ھەرێم بەردەوام دەبێت تاوەکو پڕۆسەی بە بانکیکردنی مووچەی فەرمانبەران تەواودەبێت، بەوپێیەی ڕێوشوێنەکانی پڕۆسەی بەبانکیکردن کاتی پێویستە”.
