بەهۆی ڕژانی نەوتی ڕەش لە تانکەرێکی گواستنەوەی سووتەمەنی، ڕێگای دەشتی کۆیە(کلکە سماق) داخرا.
بەڕێوەبەرایەتی هاتوچۆی هەولێر، لە ڕاگەیەندراوێکدا ئەمڕۆ شەممە، ٢٠ی نیسانی ٢٠٢٤ ڕایگەیاند، لە کاتژمێر ١١:٠٠ی بەیانی، ئۆتۆمبێلیکی بارهەڵگر لەجۆری تانکەر تایبەت بە گواستنەوەی سووتەمەنی بەهۆی کرانەوەی قوفڵی بەتاڵکردن ڕێژەیەکی زۆر نەوتی ڕەشی ڕژاندە سەر ڕیگای کلکە سماق و لە ئەنجامدا بووە هۆی داخستنی ڕێگاکە بەڕووی شوفێران.
بەڕێوەبەرایەتی هاتوچۆی هەولێر ئاماژەیدا، تیمەکانی هاتوچۆی کۆیە و بەرگری شارستانی سەرقاڵی خاوێنکردنەوەی ڕیگاکەن و دوای پاککردنەوە و شوشتنی ڕێگاکە دووبارە ڕێگاکە بەڕووی شوفێراندا دەکرێتەوە.
هەروەها بەڕێوەبەرایەتییەکە، داوا لە شوفێران دەکات وەک ڕێگای جێگرەوە، ڕێگای سماقوڵی یان هەیبەت سوڵتان بەکاربهێنن.
ڕێگای کلکەسماق هەردوو شارۆچکەی کۆیە و دوکان بەیەکەوەگرێدەدات و بەو جۆرەیش هەولێر و سلێمانی بەیەکەوە دەبەستێتەوە.
