ئەنجوومەنی وەزیران بۆ تاوتوێکردنی پرسی مووچە کۆدەبێتەوە
![](https://zedpress.krd/wp-content/uploads/2024/01/krg-zedpress-780x470.jpg)
ئەمڕۆ چوارشەم، ٨ی ئایاری ٢٠٢٤، ئەنجوومەنی وەزیران بە سەرپەرشتیی مەسرور بارزانی سەرۆكی ئەنجوومەنی وەزیران و ئامادەبوونی قوباد تاڵەبانی جێگری سەرۆكی ئەنجوومەنی وەزیران، كۆدەبێتەوە و سێ بڕگە لە كۆبوونەوەكەدا تاوتوێ دەكات.
بەگوێرەی حکوومەتی هەرێمی کوردستان، بڕگەی یەكەمی كۆبوونەوەكە تایبەتە بە خستنەڕووی دواپێشهاتەكانی بابەتی مووچە و دارایی و پابەندییەكان لەنێوان حكوومەتی هەرێمی کوردستان و حكوومەتی فیدڕاڵیی عێراق و ئەنجامی دواكۆبوونەوەی شاندی تەكنیكیی هەردوولا لە ڕێكکەوتی ٢٧ی نیسانی ٢٠٢٤ لە بەغدا سەبارەت بە دەستپێشخەرییەكانی حكوومەتی هەرێمی كوردستان لە بواری داهاتە نانەوتییەكان و بەبانكیكردنی مووچەی فەرمانبەرانی هەرێمی کوردستان.
بڕگەی دووەمی كۆبوونەوەكە تاوتوێكردنی بابەتی بەهەمیشەییكردنی فەرمانبەرانی گرێبەست لە دامەزراوەكانی هەرێمی كوردستان دەبێت.
بڕگەی سێیەم خستنەڕووی ڕاپۆرتی وەزیری كشتوكاڵ و سەرچاوەكانی ئاو دەبێت سەبارەت بە سەردانی شاندنی وەزارتەكەیان بۆ بەغدا، تایبەت بە بابەتەكانی وەرگرتنەوەی گەنمی ئەمساڵی جووتیاران و بەگەڕخستنی پڕۆژەكانی بەنداو و ئاودێری لە هەرێمی کوردستان و سوودوەرگرتنی جووتیاران لە دەرفەتەكانی خزمەتگوزارییە كشتوكاڵییەكان هاوشێوەی ناوچەكانی دیكەی عێراق.