قوباد تاڵەبانی جێگری سەرۆکوەزیرانی هەرێمی کوردستان، ڕایگەیاند، لە چوارچێوەی پڕۆسەی یەکخستنەوەی ڕێکارە داراییەکان لەگەڵ حکوومەتی عێراق، سەرپەرشتی کۆبوونەوەی لیژنەی باڵای تۆماری بایۆمەتری کردووە.
لەوبارەیەوە ڕایگەیاند: “هەموو مووچەخۆرێک دەبێت تۆماری بایۆمەتری هەبێت و ببێتە خاوەنی ژمارەی کەسیی بێهاوتا، چونکە ئەم ژمارەیە دەبێتە بناغەی هەموو مامەڵەیەکی حکومی، وەزارەتی دارایی حکومەتی فیدراڵیش لەسەر بنەمای داتاکانی تۆماری بایۆمەتری تەمویلی مووچەخۆرانی هەرێم دەکات”.
قوباد تاڵەبانی ئاماژەی بەوەش کرد کە لایەنە پەیوەندیدارەکانیان ڕاسپاردووە تاوەکوو: “ڕێکاری پێویست بگرنەبەر بۆ چارەسەرکردنی تێبینییە تەکنیکییەکانی وەزارەتی دارایی عێراق و تیمی هاوبەشی دیوانی چاودێری دارایی لەسەر داتا و زانیارییەکانی مووچەخۆرانی هەرێم لەپێناو خێراترکردنی پڕۆسەی تەمویلکردن و دابەشکرنی مووچە”.
لەبارەی ناوەڕۆکی کۆبوونەوەکەشەوە ئاشکرای کرد: “لەکۆبوونەوەکەدا بڕیاردرا هەر مووچەخۆرێک تۆمار نەکرابێت و گرفتی یاسایی نەبێت ئاسانکاری بۆ بکرێت بۆ خۆتۆمارکردن”.
