دەیان دۆنم ڕەز و دارستان و ١٦ پورەی هەنگ سووتان
![](https://zedpress.krd/wp-content/uploads/2023/08/Zed-Press-news-225-copy-780x470.jpg)
زێدپرێس
ئەمڕۆ دووشەم ٢٧ی ئابی ٢٠٢٣، بەڕێوەبەرایەتی پۆلیسی دارستان و ژینگەی پارێزگای سلێمانی، ڕایگەیاند، بەهۆی ڕووداوێکی ئاگرکەوتنەوە لە سنووری گوندی (کانی بوکێ)ی سەر بە ماوەت، دوو دۆنم پووش و پاوان و دارستان و ڕەز و باخی هاووڵاتیان سووتان.
پۆلیسی دارستان و ژینگەی سلێمانی ئاماژەی بەوە کردووە، دوای ئاگادارکردنەوەیان لە ڕووداوەکە، دەستبەجێ مەفرەزەیەکی پۆلیسی دارستانی ماوەت گەیشتوونەتە شوێنەکە و لە ماوەیەکی کەمدا ئاگرەکەیان کۆنتڕۆڵ کردووە، لەکاتی کوژاندنەوەی ئاگرەکەشدا، کارمەندێکی پۆلیسی دارستانی ماوەت بریندار بووە.
هێشتا هۆکاری ئاگرکەوتنەوەکە نادیارە.
هاوکات، بەڕێوەبەرایەتی پۆلیسی دارستان و ژینگەی ڕاپەڕین بڵاوی کردەوە، ڕۆژی شەممە ٢٦ی ئاب، لە ڕووداوێکی ئاگرکەوتنەوە لە سنووری گوندی بێگەڵاسی شارەدێی هەڵشۆ، ئاگادارکراونەتەوە و پاش گەیشتنی مەفرەزەیەکی پۆلیسی دارستان و ژینگەی هەڵشۆ، بەهاوکای هاووڵاتییانی ناوچەکە، لەماوەی نزیکەی پێنج کاتژمێردا ئاگرەکەیان کۆنتڕۆڵ کردووە.
بەهۆی ئاگرەکەوە، نزیکەی ٤٠ دۆنم لە داری سروشتی و ڕەز و باخی هاووڵاتییان زیان پێگەیشتووە و ١٦ پورەی هەنگیش سووتاون.
پۆلیسی دارستان و ژینگەی ڕاپەڕین ئاماژەی بەوە کردووە، کە پەڕاوی لێکۆڵینەوە بۆ ڕووداوکە کراوەتەوە و بەدواداچوون بۆ زانینی هۆکارەکەی، بەردەوامە.