زێدپرێس
بەڕێوبەرایەتی تەندروستی سلێمانی هۆشداری دەدات لە زیادبوونی حاڵەتەکانی سکچوون و ڕشانەوە و گومانی هەبوونی کۆلێرا ڕادەگەیەنێت.
ئێوارەی ئەمڕۆ یەکشەم ٢٧ی ئابی ٢٠٢٣، بەڕێوەبەرایەتی گشتی تەندروستی سلێمانی لە هۆشدارییەکدا، هاووڵاتیانی سنووری سلێمانی ئاگادار دەکاتەوە لەوەی “حاڵەتەکانی سکچوون و ڕشانەوە بەشێوەیەکی بەرچاو زیادی کردووە و گومانی بڵاوبوونەوەی کۆلێرای لێ دەکرێت”.
تەندروستی سلێمانی دەڵێ “سەرجەم تیمەکانی بەڕێوەبەرایەتیمان ئێستا پشکنین و بەدواداچوون بۆ حاڵەتەکان دەکەن”.
تەندروستی سلێمانی داوا لە هاووڵاتیان دەکات، خۆیان بەدوور بگرن لە بەکارهێنانی ئەو ئاوەی لە سەرچاوەکەی دڵنیا نین و تەنیا ئەو ئاوەی لەلایەن بەڕێوەبەرایەتی ئاوی سلێمانی دابین دەکرێت و هەروەها ئاوی بوتڵکراو کە لە ژێر چاودێری تیمەکانی تەندروستیدا کاردەکەن، بەکاربهێنن.
هەر لە ڕاگەیەنراوەکەدا هاتووە، هاوکات بڕیاردرا بە قەدەغەکردنی هەموو جۆرە سەوزە و ماستاو لە چێشتخانە و خواردنگەکان و شوێنە گشتییەکان، تەنیا ڕێگە دەدرێت بە بەکەرهێنانی ماستاوی لەقتوونراو.
بەڕێوەبەرایەتی گشتی تەندروستی سلێمانی دوا لە هاوڵاتیان دەکات پابەندی ڕێنماییە خۆپارێزییەکان بن و دڵنیایان دەکاتەوە لەوەی هەموو ئامادەکارییەکی تەواوی کردووە بۆ هەر ئەگەرێك لەزیادبوونی حاڵەتەکاندا .
