زێدپرێس
بەپێی ڕاگەیەندراوێکی بەڕێوەبەرایەتییەکە، ئەمڕۆ شەممە، ١١ی تشرینی دووەمی ٢٠٢٣، لێژنەیەکی بەڕێوەبەرایەتییەکە سەردانی مەیدانی ئاژەڵانیان کردووە، بەمەبەستی بەدواداچوون لەسەر ڕاستی و دروستی گرتەیەکی ڤیدیۆیی کە لە تۆڕە کۆمەڵایەتییەکاندا بڵاوکراوەتەوە و ئاماژەی بە سەربڕینی ئاژەڵی نەخۆش و فرۆشتنەوەی گۆشتەکەی کردووە، لە مەیدانی ئاژەڵانی هەولێردا.
مەیدانی ئاژەڵانی هەولێر، کەوتووەتە بەشی ڕۆژئاوای شارەکە.
لەبەدواداچوونە مەیدانییەکەدا، لێژنەکە، چوار ئاژەڵی سەربڕدراو و ئامادەکراویان بینیوە، کە بۆ فرۆشتن ئامادەکراون، “ئەمەش پێچەوانەی ڕێنماییەکانی تەندروستییە، کە دەبێت ئاژەڵ تەنیا لە کوشتارگەی هاوچەرخی هەولێر سەرببڕدرێت”، ڕاگەیەندراوەکە وا دەڵی.
زیاتر دەڵێ، “بۆیە خاوەنەکەی ڕێکاری یاسایی بەرانبەر دەگیرێتە بەر و تیمەکانیش دەستیان گرتووە بەسەر ئاژەڵە سەربڕدراوەکاندا و ناردوویانن بۆ کوشتارگەی هاوچەرخی هەولێر بە مەبەستی پشکنین و دڵنیابوونەوە لە تەندروستی ئاژەڵەکان”.
