زێدپرێس
تۆمەتبارێک کە لە پۆلیسی نێودەوڵەتی (ئینتەرپول) داواکراوە، لەلایەن مەفرەزەکانی بنکەی پۆلیسی حاجیاوا دەستگیرکرا.
ئەمڕۆ دووشەم، ٢٧ی تشرینی دووەمی ٢٠٢٣، پۆلیسی ڕاپەڕین ئاشکرای کرد، لەلایەن مەفرەزەکانی بنکەی پۆلیسی حاجیاوا تۆمەتبارێک بەناوی (ف. ج. ک) دەستگیرکرا، کە لەدایکبووی ١٩٨٨ و بەپێی ماددەی ٤٠٦ لەیاسایی سزادانی عێراقی تۆمەتبارکراوە.
بەپێی ڕاگەیەندراوەکە، تۆمەتبارەکە، لە بنەڕەتدا کورد و هەڵگری ڕەگەزنامەی کۆماری ئیسلامی ئێرانە، لە ساڵی ٢٠١٧دا لە شاری خانی (پیرانشار)ی ڕۆژهەڵاتی کوردستان کەسێکی کوشتووە و دواتر هەڵاتووە بۆ هەرێمی کوردستان و لە دادگای لێکۆڵینەوەی هەولێر فەرمانی گرتنی بۆ دەرچووە.
پۆلیسی ڕاپەڕین دەڵێ، ئێستا تۆمەتبارەکە، بەبڕیاری دادوەر ڕاگیراوە و دوای تەواوکردنی ڕێکارە یاساییەکان ڕەوانەی شوێنی داواکراو دەکرێتەوە.
