زێدپرێس
ئەمڕۆ سێشەم، ٢٦ی کانوونی یەکەمی ٢٠٢٣، عادل ساڵح بەڕێوەبەری ڕاگەیاندنی وەزارەتی کاروباری شەهیدان و ئەنفالکراوانی حكوومەتی هەرێمی كوردستان ڕایگەیاند، بەپێی بڕیارێکی سەرۆكایەتیی ئەنجوومەنی وەزیران، كەسوكاری شەهیدان و ئەنفالكراوان و زیندانییانی سیاسی، بەرکەوتووانی چەکی کیمیایی و رزگاربووانی شاڵاوی ئەنفال كە تا ئێستا لە پێدانی زەوی نیشتەجێبوون سوودمەند نەبوونە، یەكەی نیشتەجێبوونیان پێ دەدرێت.
زیاتر دەڵێ “سەرجەم دامودەزگا پەیوەندیدارەكانیش ڕاسپێردراون، كار لەسەر بڕیارەکە بكەن”.
لە کۆی زیاتر لە ١٠٠ هەزار لە کەسوکاری شەهیدان و ئەنفالکراوان و گیراوانی سیاسی، ژمارەیەکی دیاریکراویان پێشتر زەوی نیشتەجێبوونیان پێدراوە و لەماوەی چەند ساڵی ڕابردووشدا، زیاتر لە هەزار پارچە زەوی دیکە بەسەر كەسوكاری شەهیدان و ئەنفالكراوان و گیراوانی سیاسی دابەش کراوە.
