ژمارەیەک لە هاووڵاتییان و چالاکانی شارەکە، ڕێگای سەرەکی کۆیە بەڕووی تانکەر و بارهەڵگرەکان دادەخەن.
ئەمڕۆ چوارشەم، ٨ی ئایاری ٢٠٢٤، ژمارەیەک لە هاووڵاتییان و چالاکانی شارەکە، لەڕێگەی دروستکردنی بەربەستی خۆڵەوە، ڕێگەی کۆیەیان بەڕووی تانکەر و بارهەڵگرەکان داخست.
چەند هەفتەیەکە ڕێگەی کۆیە بەڕووی تانکەر و بارهەڵگرەکان کراوەتەوە، بەڵام هەر لەو ماوە کورتەدا، چەندین ڕووداوی هاتوچۆ لەسەر ڕێگاکە ڕوویاندا و چەندین قوربانییان لێکەوتەوە. دواین ڕووداوی هاتوچۆ لە ڕێگای کۆیە-هەولێر، لە چەند ڕۆژی ڕابردوو لە نێوان بارهەڵگرێک و دوو ئۆتۆمبێلی تایبەت ڕوویدا و لە ئەنجامدا سێ کەس گیانیان لەدەستدا و یەکێکی دیکەیش بریندار بوو.
هەرسێ کۆچکردووەکە، خەڵکی سنوری کۆیە بوون.
ڕێگای هەولێر-کۆیە، لە شەقامێکی تاک-سایدی کۆن پێکهاتووە و بەهۆی زۆری ڕووداوەکانی هاتوچۆ و ژمارەی قوربانییانەوە، دانیشتووانی شارەکە بە “ڕێگای مەرگ” ناوی دەبەن.
