هاوکات دادگای فیدڕاڵی، ئەو بڕیارە وەلائییەی بۆ ڕاگرتنی کارەکانی کۆمسیۆنی هەڵبژاردنەکان دەریکردبوو، هەڵوەشاندەوە.
لە ٧ی ئایاری ئەمساڵ، دادگای باڵای فیدڕاڵیی عێراق لە فەرمانێکی وەلائی دەرکرد و تیایدا داوای ڕاگرتنی ڕێکارەکانی جێبەجێکردنی بڕگەی دووەم لە ماددەی دووەمی سیستەمی تۆمارکردنی کاندیدان و پەسندکردنیان بۆ هەڵبژاردنی پەرلەمانی کوردستان کرد.
بڕیارەکەی دادگا، پێوەست بوو بەو سکاڵایەی پێشتر مەسرور بارزانی سەرۆکی حکوومەتی هەرێمی کوردستان، پێشکەشی دادگاکەی کردبوو.
کۆمسیۆنی باڵای سەربەخۆی هەڵبژاردنەکانی عێراق لەسەر بنەمای بڕیارەکەی دادگای باڵای فیدڕاڵی، کارەکانی ڕاگرت تا ئەوکاتەی سکاڵاکەی سەرۆکوەزیرانی هەرێمی کوردستان یەکلا دەکرێتەوە.
ئێستا، دوای ڕەتکردنەوەی سکاڵاکەی مەسرور بارزانی و هەڵوەشاندنەوەی ئەو فەرمانە وەلائییەی پێشتر دادگا دەریکردبوو، کۆمسیۆنی هەڵبژاردنەکان دەست بە کارەکانی پێوەست بە بەڕێوەچوونی هەڵبژاردنی پەرلەمانی کوردستان دەکاتەوە.
