بەڕێوەبەرایەتییەکە، لە ڕاگەیەندراوێکدا، ئەمڕۆ شەممە، ١٠ی ئابی ٢٠٢٤ بڵاویکردەوە، بە بەهاوکاری لێژنەی قایمقامیەتی قەزایی ناوەندی هەولێر، سەردانی ژمارەیەک دوکان، کۆگا، مارکێت و شیرنەمەنییان کردووە، بەمەبەستی کۆنتڕۆڵکردنی کەلوپەلی قەدەغە و بەسەرچوو.
بەڕێوەبەرایەتییەکە دەڵێ، لە چوارچێوەی هەڵمەتەکەدا، چوار شوێنیان داخستووە و دەستیشیان بەسەر نزیکەی ١٧ هەزار دانە ڤیپ و جگەرەی ئەلیکترۆنیدا گرتووە، جگە لە دەستگرتن بەسەر نزیکەی حەوت هەزار تامی نێرگەلە و ٧٥ تامی ڤیپ.
لە ٣ی کانوونی دووەمی ٢٠٢٤دا، نەبەز عەبدولواحید قایمقامی قەزای ناوەندی هەولێر، دەستپێکردنی هەڵمەتێکی بۆ دەستبەسەرداگرتنی ڤیپ و جگەرەی ئەلیکترۆنی لە شارەکە ڕاگەیاند و گوتیشی وێڕای دەستگرتن بەسەر ژمارەیەکی زۆر لە ڤیپ و جگەرەی ئەلیکترۆنی، لە دەستپێکی هەڵمەتەکەدا نۆ شوێنیان داخستووە.
پێشتر حکوومەتی هەرێمی کوردستان بڕیاری لەسەر قەدەغەکردنی فرۆشتن و بەکارهێنانی ڤیپ و جگەرەی ئەلیکترۆنی دەرکردووە. ماوە ماوە حکوومەتە خۆجێییەکان دەستپێکردنی هەڵمەتی قەدەغەکردن و دەستبەسەرداگرتنی ڤیپ و جگەرەی ئەلیکترۆنی بەتایبەت لەناوەندی هەولێر ڕادەگەیەنن، بەڵام وەک دەردەکەوێت، بازرگانیکردن بە ڤیپ و جگەرەی ئەلیکترۆنی بەردەوامە.
