نێچیرڤان بارزانی سەرۆکی هەرێمی کوردستان ڕایگەیاند، بڕیارەکەی سەرۆکی ئەمریکا بە دانانی نێردەیەکی تایبەت بە عێراق، جەخت لە بایەخی ستراتیژیی عێراق و هەرێمی کوردستان لە پەرەپێدان بە بەرژەوەندیی هاوبەش و سەقامگیری لە ناوچەکەدا دەکاتەوە.
سەرۆکی هەرێمی کوردستان لە پەیامێکدا کە لە تۆڕی کۆمەڵایەتی ئێکس بڵاویکردووەتەوە، نووسیویەتی: “پێشوازی لە دانانی بەڕێز مارک ساڤایا لەلایەن سەرۆک دۆناڵد ترامپەوە دەکەم وەک نێردەی تایبەت لە کۆماری عێراقدا”.
زیاتر دەڵێ: “ئەم بڕیارە جەخت لە بایەخی ستراتیژیی عێراق و هەرێمی کوردستان لە پەرەپێدان بە بەرژەوەندیی هاوبەش و سەقامگیری لە ناوچەکەدا دەکاتەوە”.
ڕۆژی دووشەم، دۆناڵد ترامپ سەرۆکی ئەمریکا بڕیاریدا بە دانانی مارک ساڤایا وەک نێردەی تایبەتی سەرۆک لە کۆماری عێراق.
