پەیامێکی تایبەت لە وەزیری ڕۆشنبیری حکوومەتی هەرێمەوە

زێدپرێس

ئەو دەربڕینانەی وەزیری ڕۆشنبیری و لاوانی حکوومەتی هەرێمی کوردستان، لە چوارچێوەی پەیامێکی تایبەتدا دێت، کە لە هەژماری تایبەتی خۆی لە تۆڕی کۆمەڵایەتی فەیسبووک بڵاوی کردووەتەوە و بە دەربڕینێکی ئەدەبییەوە گوزارشت لە دۆخی ئێستای کورد لە پێوەندی لەگەڵ عێراق دەکات.

دەقی پەیامەکە:

پەیامێك بۆ براكەم

سڵاو براكەم

تۆ دەزانی كورد نەتەوەیە‌ و كوردستان  نیشتمانی  كورد‌ و چەند نەتەوەیەكی ترە. لە دێرزەمانەوە كورد لەسەر خاك ‌و نیشتمانی خۆی دەژی ‌و وەك برا لەگەڵ نەتەوەكانی تر هەڵسوكەوتی كردووە.

كورد هیچ كات هەوڵی لەناوبردن‌ و داگیركاری نەداوە ‌و هەرگیز جێگەی مەترسی نەبووە بۆ سەر ئەوانی  دیكە، بەڵام سەدان هێرشی مەترسیدار كراوەتە سەر خاكەكەی‌ و هەزاران پیلانی لە دژ گێڕدراوە، تا ئاستی كۆچپێكردن ‌و ئەنفال ‌و كیمیاباران.

بە تێپەڕبوونی كات، بۆ دۆست ‌و دوژمن دەركەوتووە، ئەم گەلە بە زەبر‌وزەنگ ‌و كوشتار ‌و كۆمەڵكوژی، نە لەناودەچێ‌، نە ملكەچ دەكات. بەردەوام ڕووبەڕووی هێرش‌ و پەلاماردان ‌و هەوڵەكانی لەناوبردن بۆتەوە. ئەمەش كۆتایی نایەت هەوڵی لەناوبردنی بدرێت، ئەمیش پەلەقاژەی خۆی دەكات تا ئاخر زەمان.

بۆچی جوڵانەوەكانی كورد لە ڕابردوو و ئێستادا بێ‌ئەنجام بووە؟

ئەگەر هۆكار ڕیز دەكەی، بەلای منەوە یەكتر قبوڵنەكردن‌ و حساب بۆ یەك نەكردن، یەكەمین هۆكارە. ئەم بارودۆخە نالەبار ‌و لێڵ‌ و تەمومژاوییەی ئێستاش، نە حساباتی هەڵە ‌و نە ئامار ‌و داتا‌ و نە فەنیاتە!

برای عەرەبی چاوڕەش ‌و چەند زڕبرای تر ڕایان وایە، كورد لە كاتی نووسینەوەی دەستووری هەمیشەیی عێراقی نوێدا، پشتیوانی بەهێزی نێودەوڵەتی هەبووە ‌و خۆشی یەك ‌و یەكگرتوو بووە، پێیان وایە ئەو دۆخە ئێستا پێچەوانە بۆتەوە، ئیدی كاتی ئەوەیە مادەی ١٤٠ لە گۆڕ بنرێ‌‌ و هێزی پێشمەرگەی  كوردستان چەك بكرێ‌ ‌و… هتد.

جا براكەم ئەمە ڕاستیی مەسەلەكەیە، ئەگەر تۆش لات وایە ‌و لەو باوەڕەدای برات نەزان بووم ‌و سەرم لە ئیدارەدانی ئەم وڵاتە دەرنەچووە‌ و ئەو ماوەیەش نموونەیەكی ناشیرینم نیشانداوە؟

ئەوە نابێ‌ تۆ لە داخی من، هەوڵ بدەی دوژمن بهێنیتەوە سەر خۆت، یان خۆتی ڕادەست بكەی، دەبێ‌ هەوڵ بدەی ‌و بكۆشی، لە ڕێگەی خەباتی مەدەنی ‌و سندووقی دەنگدانەوە بێیتە شوێنی برات ‌و زانایی‌ و دانایی‌ و كوردبوونی خۆت بسەلمێنی.