زێدپرێس
بەڕێوەبەرایەتی پۆلیسی هەولێر، ئێوارەی پێنجشەم ٢٨ی ئەیلوولی ٢٠٢٣، ڕاگەیەنراوێکی لەمەڕ ئەو پۆلیسە بڵاوکردەوە، کە لەسەر قەڵای هەولێر پەلاماری گەنجێک دەدات و بەشێوەیەکی توندوتیژانە مامەڵەی لەگەڵ دەکات و گرتەڤیدیۆی لێدوان و پەلاماردانەکەیش لە تۆڕە کۆمەڵایەتییەکاندا بەفرەوانی بڵاوکرایەوە و دەنگدانەوەی زۆری دروستکردووە.
بەڕێوەبەرایەتی پۆلیسی هەولێر، لە ڕوونکردنەوەکەیدا دەڵێ، بەو هۆیەوە ئەفسەرێک و پۆلیسێک دەستبەسەرکراون.
دەقی ڕوونکردنەوەکە:
ڕوونکردنەوەیەک بۆ ڕای گشتیی
سەبارەت بەو گرتە ڤیدیۆیەی بڵاوکراوەتەوە لە بارەی ئەو پۆلیسەی لە ڕێورەسمی یادی لە دایکبوونی پێغەمبەری ئیسلام پێشەوای مرۆڤایەتی و فەخری کائینات حەزرەتی محەمەدولمستەفا (دروودی خوای لەسەر بێت) لە سەر قەڵای ھەولێر بە شێوەیەکی ناشایستە مامەڵە لەگەڵ گەنجێک دەکات و پەلاماری دەدات، بەپێویستی دەزانیین بۆ ھەموو لایەکی ڕوونبکەینەوە، لە کاتێکدا کە ژمارەیەکی زۆری ھاوڵاتییانی شاری ھەولێری پایتەخت بە چالاکی و شێوازی جیاواز لەو ڕۆژە پیرۆزەدا خۆشەویستی خۆیان بۆ پێغەمبەری ئیسلام دەردەبڕی لە نێو سەنتەری شار، لە ھەمانکاتدا کۆمەڵێک گەنج لە سەر قەڵاتی ھەولێر بە ئەنجامدانی چەند کردار و ڕەفتارێکی ناشایستە ھاوڵاتیانیان ناڕەحەت و بێزارکردبووە، بۆ کۆنتڕۆڵکردنی ئەو بارودوخە و ئیجرائات وەرگرتن لەگەڵ ئەو گەنجانە پۆلیس ڕەوانەی شوێنەکە کران، بەڵام بەداخەوە لەلایەن یەکێک لە پۆلیسەکان بەشێوازێکی ناشایستە پەلاماری یەکێک لە گەنجەکان درا، لە بەرامبەر ئەو ڕەفتارە نابەجێیە ئەفسەرێک و ئەو پۆلیسە لەلایەن بەڕێوەبەرایەتیەکەمانەوە دەستبەسەرکراون و لیژنەی لێکۆڵینەوەیان لە سەر پێکھێنراوە و بەپێی یاسا مامەڵەیان لەگەڵدا دەکرێت.
ھاوڵاتییان و ھاوشاریانی خۆشەویستی شارەکەمان دڵنیا دەکەینەوە ھیچ کەسێک لە سەرووی یاساوە نییە.
بەڕێوەبەرایەتی پۆلیسی پارێزگای ھەولێر
٢٠٢٣.٩.٢٨
