زێدپرێس
ئەمڕۆ یەکشەم ١ی تشرینی یەکەمی ٢٠٢٣، ژمارەیەکی زۆر لە مامۆستایانی خوێندنی کوردی لە کەرکووک، بایکۆتی وانەگوتنەوەیان کرد و گردبوونەوەی ناڕەزایەتییان ڕێکخست.
مامۆستایانی خوێندنی کوردی لە کەرکووک، بە پاڵپشتی یەکێتی مامۆستایانی کوردستان/لقی کەرکووک گردبوونەوە و خۆپیشاندانیان کرد. لە خۆپیشاندانەکەدا، داوایان کرد، بەشی خوێندنی کوردی لە کەرکووک بۆ سەر میلاکی حکوومەتی عێراق بگوازرێتەوە.
مامۆستایانی خوێندنی کوردی لە کەرکووک، لەسەر میلاکی وەزارەتی پەروەردەی حکوومەتی هەرێمی کوردستانن و هاوشێوەی مامۆستایان و مووچەخۆرانی هەرێمی کوردستان مووچەی دوو مانگی ڕابردوویان وەرنەگرتووە.
مامۆستانی خوێندنی کوردی لە کەرکووک، کە لە بەردەم پەروەردەی گشتی کەرکووک گردبوونەوە، باسیان لەوە کرد، کەوتوونەتە نێوان دوو بەرداشی حکوومەتی هەرێم و بەغدا، نە حکوومەتی هەرێم دەتوانێت مووچەکانیان بۆ خەرج بکات و نە حکوومەتی عێراق خاوەندارێتییان دەکات، لەکاتێکدا ئەوان لەسەر میلاکی حکوومەتی هەرێمی کوردستانن.
