زێدپرێس
ئەمڕۆ هەینی ٢٠ی تشرینی یەکەمی ٢٠٢٣، بزووتنەوەی حەماس ئازادکردنی دوو بارمتەی ئەمریکایی ڕاگەیاند. ئازادکردنی هەردوو بارمتەکە بەدوای دەستپێشخەری و ناوبژیوانی قەتەر دێت، لە نێوان حەماس و ئەو وڵاتانەی کە هاووڵاتییەکانیان لەلایەن چەکدارانی حەماسەوە بە بارمتە گیراون.
دوو هاووڵاتییە ئەمریکاییەکە، دایک و کچێکن؛ جودی ڕانان تەمەن ٥٩ ساڵ و کچەکەی، ناتالی ڕانان تەمەن ١٧؛ هەردووکیان لە ٧ی تشرینی یەکەم لە هێرشەکەی حەماس بۆ سەر ئیسڕائیل لەگەڵ زیاتر لە ١٠٠ بارمتەی دیکە دەستگیرکران و بۆ کەرتی غەززە گواسترانەوە.
هەر ئەمڕۆ هەینی، نووسینگەی سەرۆکوەزیرانی ئیسڕائیل ڕایگەیاند، هەردوو بارمتە ئەمریکاییەکە لە کەرتی غەززەوە گەیشتوونەتە تەلئەڤیڤ-ئیسڕائیل و بەیانی دەگەنەوە لای کەسوکارییان.
دایک و کچەکە لە بنەڕەتدا نیشتەجێی ویلایەتی شیکاگۆی ئەمریکان و بە سەردانێک لە ئیسڕائیل بوون، پێش ئەوەی چەکدارانی حەماس هێرش بکەنە سەر ناوچە سنورییەکانی ئیسڕائیل. بەپێی میدیاکانی ئیسڕائیل دایک و کچەکە لە نزیکترین کۆمەڵگای سەر سنوری ئیسڕائیل و غەززە بوون و لەلایەن چەکدارانی حەماسەوە بە بارمتە گیران.
