زێدپرێس
ئەمڕۆ یەکشەم ٢٢ی تشرینی یەکەمی ٢٠٢٣، هەزاران لە مامۆستایان و وانەبێژان لە شاری سلێمانی و هەروەها لە سنوری بەڕێوەبەرایەتی پەروەردەی ئیدارە سەربەخۆکانی ڕاپەڕین و گەرمیان، دەستیان بە خۆپیشاندان و دەربڕینی ناڕەزایەتی جەماوەری کرد.
خۆپیشاندانی مامۆستایان و وانەبێژان، بەتایبەت دوای لێدوان و فەرمانە وەزارییەکەی وەزیری پەروەردەی حکوومەتی هەرێم دێت، کە هەفتەی ڕابردوو ڕایگەیاند، دەبێت ڕۆژی یەکشەم لە سنوری پەروەردەکانی سلێمانی و هەڵەبجە و گەرمیان و ڕاپەڕین و کۆیە دەست پێ بکاتەوە.
فەرمانە وەزارییەکەی وەزیری پەروەردە نەیتوانی کۆتایی بە ناڕەزایەتییەکانی مامۆستایان بێنێت، سەرەڕای پشتگیریکردنی بەڕێوەبەرایەتییە گشتییەکانی پەروەردە لەو سنورانەدا.
نوێنەری مامۆستایانی ناڕازی لە خۆپیشاندانەکەی سلێمانی، بۆ میدیاکان قسەی کرد و پێش هەر شتێک “ئیدانە”کردنی فەرمانە وەزارییەکەی وەزیری پەروەردەی ڕاگەیاند.
ئەمڕۆ یەکشەم، لە خۆپیشاندانی مامۆستایان و وانەبێژانی سلێمانیدا، کە پێداگیریان لەسەر درێژەپێدانی بایکۆت کردەوە، فەرمانبەران و ژمارەیەک لە هاووڵاتییانی شارەکەیش بۆ پاڵپشتی لە داواکارییەکانی مامۆستایان و وانەبێژان، چوونە پاڵ خۆپیشاندەرانەوە.
