زێدپرێس
وەزارەتەکە لە ڕوونكردنەوەیەکدا دەڵی، “سەرۆكایەتیی شارەوانیی هەولێر بەپێی یاسای بەڕێوەبردنی شارەوانییەکان، بۆ ڕێکخستنەوەی شار و شەقام و جەنجاڵی هاتوچۆ لەسەر کەوانەیەکی شەقامی شەست مەتری لە هەولێر، بابەتێكی دیراسە كردووە، بەمەبەستی زانینی کاریگەرییەکان، بەڵام ئەم بابەتە تەنیا بۆ تاقیکردنەوەیە و لە چوارچێوەی دیراسەتكردنە و ناچێتە بواری جێبەجێكردنەوە”.
وەزارەتی شارەوانی ڕوونی نەکردووەتەوە، مەبەست لەو “تاقیکردنەوە” و “زانینی کاریگەرییەکان” چی بووە.
ڕوونکردنەوەکەی وەزارەتی شارەوانی و گەشتوگوزار لەکاتێکدا دێت، کە دوێنێ یەکشەم، ١٢ی تشرینی دووەمی ٢٠٢٣، لەگەڵ جێگیرکردنی هێماکانی تایبەت بە وەرگرتنی کرێی ئەو ئۆتۆمبێلانەی لە شەقامی ٦٠ مەتریی هەولێر دەوەستن، بەرپرسانی شارەوانی هەولێر و بەڕێوەبەرانی خودی پڕۆژەکە، وەک بڕیارێکی یەکلاکراوە قسەیان لەسەر کرد و ئاماژەیان بەوە نەکرد بابەتەکە بۆ تاقیکردنەوە بێت.
ڕاگەیاندنی پڕۆژە و بڕیاری وەرگرتنی کرێ لەو شوفێرانەی ئۆتۆمبێلەکانیان لەسەر شەقامی ٦٠ مەتریی ڕادەگرن، ناڕەزایەتی بەرفرەوانی لە ئاست هاووڵاتییان و بەشدارانی تۆڕە کۆمەڵایەتییەکان لێکەوتەوە.
