زێدپرێس- محەمەد عەبدوڵا
گۆڤاری سی ئۆ ئی ئەمریکی ئەمڕۆ سێشەم، ٢١ی تشرینی دووەمی ٢٠٢٣ ڕیزبەندی لیستی ٢٦ کۆنترین شارە مێژووییەکانی جیهانی بڵاوکردەوە.
لە لیستەکەدا شاری هەولێر پلەی چوارەمی لە ڕیزبەندەکەدا وەرگرتووە و بەپێی ڕاپۆرتەکە، شاری هەولێر ٦ هەزار ساڵ پێش زایین ئاوەدانکراوەتەوە. ڕاپۆرتەکە دەڵێت پێشتر شارەکە لەلایەن ئاشورییەکان و سەلجوقییەکان و عوسمانییەکانەوە داگیرکراوە، بەڵام تاکوو ئێستا وەکوو نمونەیەکی هەمەجۆری نەتەوەیی و ئایینی ماوەتەوە، کە کورد و ئاشوری و ئەرمەنی و عەرەب و تورکمانی عێراقی تێدا دەژن.
ئەوەی جێی سەرنجە لە ڕیزبەندیەکەدا هەولێر لە پێش ئەستەنبوڵی تورکیا و ئەسینای یۆنانەوە هاتووە، کە بە دوو شاری مێژوویی دادەنرێن و پلەی شەشەم و هەشتەمیان وەرگرتووە.
هەر لەناو شارەکانی کوردستاندا، شاری دیلۆك (عەنتاب) لە باکوری کوردستان پلەی ١٤هەمینی وەرگرتووە کە سێ هەزار و ٥٠٠ ساڵ پێش زایین لە سەردەمی چاخی بڕۆنزدا ئاوەدانکراوەتەوە.
شاری کەرکووکیش لە باشوری کوردستان لە ڕیزبەندی ٢٠هەمین دێت، کە دوو هەزار و ٢٠٠ ساڵ پێش زایین ئاوەدانکراوەتەوە و تاکو ئێستاش ژیان تێیدا بەردەوامە. ئەو شارە کورد و عەرەب و تورکمانی تێدا دەژین، هەروەها شوێنەواری دێرینی ئەکەدییەکان و ئاشورییەکان و جوویشی تێدایە.
جێی ئاماژەپێدانە کە شاری ئەریحا لە کەرتی ڕۆژئاوای فەڵەستین ڕیزبەندی یەکەمی لیستەکەی وەرگرتووە، کە مێژووەکەی بۆ نۆ هەزار و ٣٠٠ تا ١١ هەزار ساڵ پێش زایین دەگەڕێتەوە.
