زێدپرێس
نووسینگەی سەرۆکوەزیرانی عێراق ڕایگەیاند، ئەمڕۆ شەممە، ١٦ی کانوونی یەکەمی ٢٠٢٣، هاوکات لەگەڵ دەستپێکردنی پڕۆسەی دەنگدانی تایبەت بۆ هەڵبژاردنی ئەنجوومەنی پارێزگاکانی عێراق، محەمەد شیاع سوودانی سەرۆکوەزیران و فەرماندەی گشتی هێزە چەکدارەکانی عێراق لەگەڵ سەرکردە و فەرماندە سەربازی و ئەمنییەکان کۆبووەتەوە.
لە کۆبوونەوەکەدا، دووپاتی لەسەر ئەوە کردووەتەوە، کە هیچ فشار و کاریگەرییەک لەسەر ئەندامانی هێزە سەربازی و ئەمنییەکان درووست نەکەن و هەڵبژاردنی هەر لیست و کاندیدێک بۆ خۆیان جێبهێڵن.
سوودانی هەروەها ڕایگەیاندووە، بەرزترین ئاستی ئامادەکاری لەبەرگیراوە بۆ ڕێگەگرتن لەهەر پێشێلکارییەکی ئەمنی کە ئامانج لێی تێکدانی پڕۆسەی هەڵبژاردن بێت.
لە کاتژمێر ٧:٠٠ی بەیانی ئەمڕۆ شەممەوە، پڕۆسەی دەنگدانی تایبەت (سەربازی و ئاوارەکان) بۆ هەڵبژاردنی ئەنجوومەنی پارێزگاکانی عێراق دەستیپێکردووە.
