زێدپرێس
مەریوان عەزیز، بەڕێوەبەری گشتیی کار و دەستەبەری کۆمەڵایەتی، بە ماڵپەڕی فەرمی حکوومەتی هەرێمی ڕاگەیاند: “پێویستە هەر خاوەن پڕۆژەیەک کرێکارەکانی بۆ بەڕێوەبەرایەتیی دەستەبەری کۆمەڵایەتی بنێرێت تاکوو خۆیان دەستەبەر بکەن. لەو دەستەبەرەدا، ٥٪ی مووچەی کرێکار و ١٢٪ی داهاتی خاوەنپڕۆژە دەخرێتە سەر سندوقی خانەنەشینی و دوای ئەوەی کرێکار گەیشتە خانەنشینبوون، خانەنشینییەکەی دەدرێتێ”.
گوتیشی “جگە لە پرسی خانەنشینی و دەستەبەری کۆمەڵایەتی، نابێت هیچ کرێکارێک مووچەکەی لە ٣٥٠ هەزار کەمتر بێت”.
بە دوو یاسا پارێزگاری لە مافی کرێکاران دەکرێت، یاسای خانەنشینی و دەستەبەری کۆمەڵایەتیی ژمارە ٣٩ی ١٩٧١ و یاسای کاری ژمارە ٧١ی ساڵی ١٩٨٧.
بەپێی یاسا بەرکارەکان، تەمەنی خانەنشینیی پیاوان، ٢٠ ساڵ خزمەت و ٦٠ ساڵ تەمەنە. بۆ ئافرەتانیش ١٥ ساڵ خزمەت و ٥٥ ساڵ تەمەن دیاری کراوە. بەوەش تاکوو ئێستا ٨٨٠ کەس خانەنشینی وەردەگرن.
بەگوێرەی ئاماری بەڕێوەبەرایەتیی کار و دەستەبەری کۆمەڵایەتی، تا ئێستا ١٤٤ هەزار و ٩٣٠ کرێکار دەستەبەرکراون.
ناوبراو گوتیشی: “هەندێک خاوەنکار دەیانەوێت کرێکاران دەستەبەر نەکرێن، هانیان نادەن و زانیارییان لێ دەشارنەوە، لەبەر ئەوەی نایانەوێت داهاتیان کەم بێتەوە، ئەمەش سزای لەسەرە، بەپێی ماددەی ٩٦، شاردنەوەی زانیاری سزای لەسەرە و تۆمەتبار لێپرسینەوەی لێ دەکرێت. بۆیە پێویستە کرێکاران هۆشیار بن و خۆیان تۆمار بکەن، تا دواتر مافی خۆیان وەرگرنەوە.”
