زێدپرێس
مامۆستایانی ناڕازی گەرمیان لە ڕاگەیەندراوێکدا ئاماژە بەوە دەکەن، کە بەگوێرەی زانیارییەکانیانی بە دەستیان گەیشتووە، لەلایەن بەڕێوەبەرایەتیی ئەوقاف و کاروباری ئایینی گەرمیانەوە، داوا لە مامۆستایانی ئایینی و وتاربێژانی سەرجەم مزگەوتەکانی دەڤەرەکە کراوە، کە لە وتاری ڕۆژی هەینیدا، داوای شکاندنی بایکۆت لە مامۆستایانی ناڕازی بکەن و بۆ هۆڵەکانی خوێندن بگەڕێنەوە.
مامۆستایانی ناڕازی لە ڕاگەیەندراوەکەیاندا، داوا لە مامۆستایانی ئایینی دەکەن، “بە ھیچ شێوەیەک نەچنە ژێرباری جێبەجێکردنی داواکارییەکەی ئەوقاف و بە گوێیان نەکەن، چونکە ئەو بایکۆتەی ئێمە درێژەمان پێ داوە تەنیا بۆ داوای مافی مامۆستایانی کەرتی پەروەردە نییە، بەڵکو داوای مافی سەرجەم مامۆستایان و فەرمانبەرانی ھەرێمی کوردستانمان کردووە کە خۆی لە گواستنەوەی مووچەدا دەبینێتەوە بۆ سەر بەغدا و مامۆستایانی ئایینی بەڕێزیش بەشکێن لە بابەتەکە” .
مامۆستایانی ناڕازی گەرمیان لە ڕاگەیەندراوەکەیاندا مامۆستایانی ئایینی بە “شوێنگرەوەی پێغەمبەری ئیسلام و پێشڕەوی کۆمەڵگا” ناودەبەن و داوا دەکەن لەڕوانگەی پابەندبوون بە ئایینی ئیسلامەوە، پاڵپشتی لە ستەملێکراوان بکەن و زیاتر دەڵێن “ھیوادارین بە ھەمان نەفەسی پێشوو دژی ستەم و ستەمکاران بوەستنەوە و پاڵپشتی ستمکاران نەبن و بەرگریکارێکی بوێر بن لە مافی مامۆستایان و فەرمانبەران “.
