ناوەڕۆکی نامەکانی مەسرور بارزانی بۆ سوودانی ئاشکرا دەکرێن
![](https://zedpress.krd/wp-content/uploads/2023/10/zed-press-pala.jpg)
زێدپرێس
ئومێد سەباح، سەرۆكی دیوانی سەرۆكایەتیی ئەنجوومەنی وەزیران، ئەمڕۆ چوارشەم، ٨ی تشرینی دووەمی ٢٠٢٣، لە کۆنگرەیەکی ڕۆژنامەوانی لە شاری بەغداوە ڕایگەیاند، لەبارەی بودجە و مووچەوە، مەسرور بارزانی، سەرۆكوەزیرانی هەرێمی كوردستان دوو نامەی فەرمیی بۆ سەرۆك وەزیرانی عێراق ناردووە.
بەگوتەی ئومێد سەباح، لە نامەی یەكەم داوا لە سەرۆكوەزیران و ئەنجوومەنی وەزیرانی فیدڕاڵی دەكات كە ئەو سێ مانگەی ماوە بۆ مووچەی هەرێمی كوردستان، بە هەر میكانیزمێك مووچەی مووچەخۆرانی هەرێمی كوردستان لەکاتی دیاریکراوی خۆیدا بنێردرێت، بۆ ئەوەی بتوانرێت مووچەی فەرمانبەران و مووچەخۆرانی هەرێمی کوردستان لەکاتی خۆیدا دابەش بکرێت.
هەروەها ئومێدی خواست، لە كۆبوونەوەكانی داهاتووی ئەنجوومەنی وەزیرانی عێراقدا دەنگ لەوبارەیەوە بدرێت.
بەگوتەی سەرۆکی دیوانی ئەنجوومەنی وەزیران، پێش ١٥ ڕۆژ، لەلایەن سەرۆکوەزیرانی هەرێمی کوردستانەوە، نامەی دووەم بۆ سەرۆکوەزیرانی عێراق ناردراوە. نامەکە پێوەستە بە هەمواکردنەوەی یاسای بودجەوە.
لە ناوەڕۆکی نامەکەدا، جەخت لەسەر زیادکردنەوەی بابەتی مووچە لە بابەتەكانی دیکە کراوەتەوە و هەروەها چۆنیەتی چارەسەرکردنی دۆسیەی نەوت و داهاتەکانی دیکەیش خراونەتەڕوو.