گوتەبێژی هێزە چەکدارەکانی عێراق: وەک کردەوەیەکی دوژمنکارانە مامەڵە لەگەڵ هێرشەکانی ئەمریکا دەکەین
![](https://zedpress.krd/wp-content/uploads/2024/01/liwa-yahya-rasul-abdulla-780x470.jpg)
لە بەرانبەر هێرشەکانی شەوی ڕابردووی ئەمریکا بۆ سەر گرووپەکانی حەشدی شەعبی لە جورف ئەلنەسەر و ئەلقایم، ئەمڕۆ ٢٤ی کانوونی دووەمی ٢٠٢٤ گوتەبێژی هێزە چەکدارەکانی عێراق ڕاگەیەندراوێکی بڵاوکردەوە و تیایدا، هێرشە ئاسمانییەکانی ئەمریکای بۆ سەر ئەندامانی سوپا و حەشدی شەعبی، بە زیانگەیاندن بە ئاسایش و سەقامگیری عێراق لەقەڵەم دا.
یەحیا ڕەسوڵ عەبدوڵا گوتەبێژی فەرماندەیی گشتی هێزە چەکدارەکانی عێراق ئاماژەی بەوە کردووە، لەکاتێکدا لێگەیشتنەکان لەمەڕ ڕۆڵ و ئەرکەکانی هاوپەیمانیی نێودەوڵەتی لە عێراق هەنگاوی ئەرێنییان ناوە بە ئاڕاستەی ڕێکخستنی پەیوەندییەکانی داهاتوو، ئەم کردەوانە ئاستەنگ لەبەردەم هەنگاوە ئەرێنییەکان دادەنێن و زیان بە ڕێککەوتنەکان و تەوەرەکانی هاوکاری هاوبەشی ئەمنی دەگەیەنن.
یەحیا ڕەسوڵ زیاتر دەڵێ، ئەم کارە قبوڵ نەکراوە و بە ئاشکرا سەروەری عێراق پێشێل دەکات و زیاتر لەوەش وەک کردەوەیەکی شەڕانگێزانە و ناڕەوا دژ بە خاک و سەروەری عێراق لێکدانەوەی بۆ کردووە.
گوتەبێژی فەرماندەیی گشتی هێزە چەکدارەکانی عێراق لە هەمان ڕاگەیەندراودا، داوا لە کۆمەڵگەی نێودەوڵەتی دەکات بەرپرسیارێتی خۆی لە پاڵپشتیکردنی ئاشتی و ئاسایش لە ئەستۆ بگرێت، هەروەها ڕێگری لە هەموو سەرپێچییەک بکات کە بە ڕاستیی مەترسی لەسەر سەقامگیری و سەروەری عێراق دروست دەکات، “لە کاتێکدا وەک کردەوەی دوژمنکارانە مامەڵە لەگەڵ ئەو ئۆپەراسیۆنانەدا دەکەین”، یەحیا ڕەسوڵ وا دەڵێ.